Հայաստանի պաշտպանության նախարար Սեյրան Օհանյանը հունվարի 26-ին ընդունել է ԱՄՆ պետքարտուղարի Եվրոպական եւ Եվրասիական հարցերով փոխտեղակալ Էրիկ Ռուբինին:
ՊՆ մամուլի ծառայությունից NEWS.am-ին հայտնում են, որ ողջունելով հյուրին, ՀՀ պաշտպանության նախարարը շնորհակալություն է հայտնել ԱՄՆ պետքարտուղարությանը` հայ-ամերիկյան պաշտպանական համագործակցության զարգացման գործում ցուցաբերած աջակցության համար:
Պարոն Ռուբինը ողջունել է ՀՀ պաշտպանական ոլորտում իրականացվող բարեփոխումների ընթացքը եւ տեղեկացրել, որ ԱՄՆ կողմը շարունակելու է այս ուղղությամբ իր աջակցությունը տրամադրել Հայաստանին: ԱՄՆ պետքարտուղարության պաշտոնյան նշել է, որ ամերիկյան կողմը բարձր է գնահատում Հայաստանի ջանքերը միջազգային անվտանգության ապահովման գործում, մասնավորապես Աֆղանստանում ՆԱՏՕ-ի կողմից իրականացվող Միջազգային անվտանգության աջակցման ուժերի կազմում հայկական զորախմբի կողմից իրականացվող առաքելությունը:
Հանդիպման ընթացքում քննարկվել են պաշտպանական ոլորտում հայ-ամերիկյան երկկողմ համագործակցությանը, ինչպես նաեւ տարածաշրջանային անվտանգությանն առնչվող այլ հարցեր:
