Հայաստանի Հանրապետության վարչապետ Տիգրան Սարգսյանի որոշմամբ Ալեքսան Կարապետյանը նշանակվել է Հայաստանի Հանրապետության քաղաքաշինության նախարարի տեղակալ։
Այս մասին NEWS.am-ը տեղեկանում է Կառավարության մամուլի ծառայությունից:
Ալեքսան Կարապետյանը ծնվել է 1950 թ. Երեւանում:
Սովորել է Ղ. Աղայանի անվան միջնակարգ դպրոցում: Ավարտել է Երեւանի էլեկտրոնային հաշվիչ մեքենաների տեխնիկումի ավտոմատիկայի եւ հեռուստամեխանիկայի բաժինը, ապա ուսումնառությունը շարունակել Երեւանի պոլիտեխնիկական ինստիտուտի շինարարական ֆակուլտետում: 1985-1989 թթ. սովորել է ԽՄԿԿ Կենտկոմին կից բարձրագույն կուսակցական դպրոցում, ստացել քաղաքագետի որակավորում:
1974-1976 թթ. աշխատել է Պոլիտեխնիկական ինստիտուտի ինժեներական հիդրոլոգիայի ամբիոնում որպես ավագ լաբորանտ: 1976-1980 թթ. ընտրվել եւ աշխատել է Երեւանի պոլիտեխնիկական ինստիտուտի 14 հազարանոց ԼԿԵՄ կոմիտեի երկրորդ, ապա՝ առաջին քարտուղար, 1980-1985 թթ.` հանրապետության շինարարական ամենախոշոր (10 հազարանոց) կազմակերպության՝ «Երեւանշին» արտադրական - շինմոնտաժային միավորման, կուսկոմիտեի երկրորդ, այնուհետեւ՝ առաջին քարտուղար։ 1985-1990 թթ. աշխատել է ՀԿԿ Կենտկոմի շինարարության եւ քաղաքային տնտեսության, ապա սոցիալ-տնտեսական բաժինների հրահանգիչ։ 1988 թ. դեկտեմբեր-1989 մարտ ամիսներին մասնակցել է Սպիտակ քաղաքի երկրաշարժից տուժած բնակչության փրկարարական աշխատանքներին:
1991-1992 թթ. աշխատել է «Պրոմեթեւս-Անդրնավթգազշին» ակցիոներական ընկերությունում որպես վարչության պետ։ 1992-1995 թթ. աշխատել է «Քաղշին» շինմոնտաժային միավորումում որպես պետի տեղակալ եւ կոմերցիոն կենտրոնի տնօրեն, 1995-1996 թթ. եղել է «ԱԿ եւ Կ» ՍՊԸ-ի նախագահ, 1996-1997 թթ.` հայ-բուլղարական «Արմբոլինվեստ» համատեղ ձեռնարկության գլխավոր տնօրեն։
«Ազգային Միաբանություն» կուսակցության հիմնադիրներից է, Ազգային ժողովի II եւ III գումարման պատգամավոր: 2003 թվականից եղել է ՆԱՏՕ-ի խորհրդարանական վեհաժողովում եւ Աշխարհի Միջխորհրդարանական միությունում ՀՀ Ազգային ժողովի պատվիրակության անդամ: Եղել է Ազգային ժողովի Հայաստան-Բուլղարիա պատգամավորական բարեկամության խմբի նախագահ, Բիզնեսի եւ պառլամենտի միջազգային ասոցիացիայի հայաստանյան գրասենյակի կոորդինացնող խորհրդի անդամ, Խորհրդարանականներն ընդդեմ կոռուպցիայի համաշխարհային գլոբալ կազմակերպության (GOPAC) հայաստանյան ազգային կառույցի անդամ։
