Հայաստանի 4-րդ գումարման Ազգային ժողովն այսօր` փետրվարի 6-ին սկսում է իր վերջին` 11-րդ նստաշրջանը:
ԱԺ-ից NEWS.am-ի թղթակիցը հայտնում է, որ գրանցվել են 97 պատգամավորներ: Ընդ որում ԱԺ նախագահ Սամվել Նիկոյանը ստիպված է եղել երկրորդ անգամ գրանցում իրականացնել, քանի որ առաջին անգամ բազմաթիվ պատգամավորներ չէին գրանցվել:
Հիշեցնենք, որ փետրվարի 3-ին տեղի է ունեցել ԱԺ աշխատանքային խորհրդակցությունը, որտեղ քննարկվել են չորրորդ գումարման Ազգային ժողովի տասնմեկերորդ նստաշրջանի եւ փետրվարի 6-9-ի ԱԺ չորսօրյա նիստերի օրակարգերի որոշման նախագծերը:
ԱԺ 11-րդ նստաշրջանի օրակարգի նախագծում ընդգրկվել է 137 հարց եւ 20 միջազգային պայմանագիր: ԱԺ առաջիկա չորսօրյա նիստերի օրակարգի նախագծում ընդգրկվել է 133 հարց, այդ թվում` 19 միջազգային պայմանագիր:
Չորրորդ գումարման ԱԺ տասնմեկերորդ նստաշրջանի եւ փետրվարի 6-9-ի ԱԺ նիստերի օրակարգերի նախագծերը կհաստատվեն ԱԺ փետրվարի 6-ի նիստում: