Հայաստանի կառավարությունն իր այսօրվա` փետրվարի 9-ի նիստում մերժել է խորհրդարանական ընտրությունները 100 տոկոս համամասնական ընտրակարգով անցկացնելու վերաբերյալ օրենսդրական նախաձեռնությունը:
Հիշեցնենք, որ այդ նախաձեռնությամբ հանդես էին եկել «Ժառանգություն» եւ ՀՅԴ խմբակցությունները:
Հարցը կառավարությունում ներկայացրել է արդարադատության փոխնախարար Գրիգոր Մուրադյանը, ով նշել է, որ այս կամ այն ընտրակարգով չէ պայմանավորված ընտրությունների արդյունավետությունն ու արդար անցկացումը: Նրա խոսքով, մեծամասնական ընտրակարգը թույլ է տալիս ԱԺ-ում ներկայացնել բնակչության որոշ հատվածների շահերը:
Ավելի վաղ NEWS.am-ը հայտնել է, որ 100 տոկոս համամասնական ընտրակարգի անցնելու նախաձեռնությամբ հանդես էին եկել «Ժառանգություն» եւ ՀՅԴ խմբակցությունները: Ավելին, այս խնդրի առնչությամբ տեղի կունենան խորհրդարանական լսումներ, որի անցկացման նախաձեռնությանը միացել է նաեւ ԲՀԿ-ն:
Այս նախաձեռնության հեղինակները նշում են, որ մեծամասնական ընտրակարգով պատգամավոր են դառնում միայն (չնչին բացառություններով) օլիգարխները: Նախաձեռնությանը կողմ են նաեւ արտախորհրդարանական ուժերը` ՀԱԿ-ն ու «Ազատ դեմոկրատներ»-ը, որոնք հայտարարությամբ իրենց աջակցությունն են հայտնել այս նախաձեռնությանը: