Այս տարի մայիսին կայանալիք խորհրդարանական ընտրությունների գլխավոր առանձնահատկությունն այն է, որ այս անգամ պայքարը գնալու է երկու իշխանական կուսակցությունների միջեւ՝ ՀՀԿ եւ ԲՀԿ: Այս մասին այսօր՝ փետրվարի 22-ին, լրագրողների հետ հանդիպմանն ասաց Հայկական սոցիոլոգիական ասոցիացիայի նախագահ Գեւորգ Պողոսյանը: Նրանք Հայաստանի տարածքում փետրվարի կեսերին այս թեմայով տարբեր տարիքային եւ սեռային խմբի 1000 մարդկանց շրջանում հարցում են անցկացրել:
Ըստ այդ հարցման արդյունքների՝ Հայաստանի հանրապետական կուսակցությունն ընտրություններին կլինի առաջին տեղում, «Բարգավաճ Հայաստանը»՝ երկրորդ տեղում, իսկ երրորդ տեղում՝ Հայ ազգային կոնգրեսը, այս երեք կուսակցությունների միջեւ կբաշխվի ձայների 75 տոկոսը: Միեւնույն ժամանակ, Գեւորգ Պողոսյանը շեշտեց, որ ՀՀԿ-ին չի հաջողվի մեծամասնություն կազմել ԱԺ-ում, առհասարակ՝ ձայների 50 տոկոսից ավելին ոչ մի կուսակցություն չի ստանա:
Վերոնշյալ կուսակցություններից հետո, Գեւորգ Պողոսյանի խոսքով, անցնելու շանսեր ունեն ՀՅԴ-ն, «Ժառանգությունը», «Օրինաց երկիրը», որոնք իրար մեջ են մրցելու, բայց կարող է նույնիսկ չանցնեն:
Նրա խոսքով՝ տարիների փորձը ցույց է տալիս, որ նախագահական ընտրություններին քաղաքացիներն ավելի ակտիվ են լինում, քան` խորհրդարանականին: Այս անգամ նա կանխատեսեց 55-56 տոկոս մասնակցություն՝ շեշտելով, որ նախորդ տարիների համեմատ աճել է քաղաքացիական ակտիվությունը երիտասարդների շրջանում:
Ընդհանուր առմամբ՝ Պողոսյանի ներկայացմամբ՝ կանխատեսելի արդյունքներով, անսպասելի դեպքերով դժվար ընտրություններ կլինեն եւ սպասվում է լուրջ պայքար, ամենաանակնկալ կոնֆիգուրացիաների ձեւավորում:
«Ամենակարեւորն այն է, որ պայքարը չվերածվի քաշքուկի, կռիվների, ծեծկռտուքի»,- ասաց Գեւորգ Պողոսյանը՝ հավելելով, որ ընտրողների մեծամասնությունը չի հավատում, որ կլինեն արդար ընտրություններ: Այս անգամ, բանախոսի կարծիքով, հայ ընտրողը փոխվել է, նա դարձել է ավելի պահանջկոտ, ավելի քննադատաբար է մոտենում իշխանություններին:
Ամփոփելով՝ Գեւորգ Պողոսյանը նշեց, որ այս ընտրությունների արդյունքները հիմք կծառայեն՝ կանխատեսելու նախագահական ընտրությունները: