Հայաստանի տարածքում, այսօր` մարտի 5-ի, ժամը 10.30-ի դրությամբ, միջպետական նշանակության ավտոճանապարհները դժվարանցանելի են:
Հայաստանի ԱԻՆ մամուլի ծառայությունից NEWS.am-ին հայտնում են, որ ձնաբքի եւ ուժեղ քամու պատճառով այս պահի դրությամբ Արագածոտնի մարզում հոսանքազրկված են հինգ գյուղեր` Ղազարավան, Ուշի, Սաղմոսավան, Արտաշավան, Օհանավան: «Հայաստանի էլեկտրացանցեր» ՓԲԸ-ի կողմից կատարվում են վթարավերականգնողական աշխատանքներ:
Ձնաբքի, մերկասառույցի եւ վատ տեսանելիության պատճառով փակ են Սելիմի լեռնանցքը, Վերին-Գետաշեն-Մադինա, Բերդ-Ճամբարակ, Ալագյազ-Նորաշեն, Ուրցաձոր-Լանջառ, Գյումրի-Սպիտակ, Գյումրի-Աշոցք, Գյումրի-Ամասիա, Արագածոտնի մարզում` Թալինի եւ Ապարանի տարածաշրջանում միջհամայնքային ավտոճանապարհները:
Դժվարանցանելի են Երեւան-Հրազդան, Երեւան-Զովունի, Դիլիջան-Սեւան, Կոտայքի մարզի Ալափարս-Սոլակ, Գեղարքունիքի մարզի Ծովակ-Ախպրաձոր ավտոճանապարհները եւ Գյումրի-Երեւան ավտոճանապարհի Լանջիկ-Մաստարա հատվածը:
ԱԻ նախարարությունը խնդրում է զերծ մնալ վերոնշյալ ճանապարհներով երթեւեկելուց:
Կատարվում են ճանապարհների մաքրման եւ մշակման աշխատանքներ: Ճանապարհների մաքրման աշխատանքները եւ երթեւեկության անվտանգությունը իրականացվում են "ՃՇՇ"-ների եւ ճանապարհային ոստիկանության համապատասխան ստորաբաժանումների հետ համատեղ:
Մարտի 5-ի, ժամը 10.30-ի դրությամբ, Վրաստանի ՆԳՆ արտակարգ իրավիճակների դեպարտամենտից ստացված տեղեկատվության համաձայն` Վրաստանի տարածքում եղանակը զգալիորեն վատացել է, եւ առկա է ձնահյուսքի վտանգ, ինչպես նաեւ վատ տեսանելիություն:
Մցխեթա-Ստեփանծմինդա-Լարս ավտոճանապարհը փակ է:
Նույն ճանապարհի Պասանաուրի - Գուդաուրի(Պոստա) եւ Կոբի- Լարսի հատվածներում առատ ձյան պատճառով երթեւեկությունը արգելված է կցորդների, կիսակցորդների եւ 30-ից ավելի նստատեղ ունեցող ավտոբուսների համար: Այլ մեքենաների համար Պասանաուրի- Մլեթա հատվածում երթեւեկությունը բաց է, Մլեթա-Գուդաուրի(Պոստա) եւ Կոբի- Լարսի հատվածներում թույլ է տրվում հակատեղապտտման շղթաներ օգտագործելու պարագայում: 2 տանող կամրջակներով մեքենաների համար երթեւեկությունը բաց է: Ստեփանծմինդա-Լարսի հատվածում մեքենաների կանգ առնելը արգելված է:
Երթեւեկության նշված կարգը կլինի Պարեկային Ոստիկանության անմիջական հսկողության եւ համակարգման ներքո:
Ճանապարհի այլ հատվածներում երթեւեկությունը բաց է:
