Թուրքիան կշարունակի Ֆրանսիայի դեմ պատժամիջոցները, քանի դեռ Հայոց ցեղասպանության ժխտումը քրեականացնող օրինագիծը մնում է օրակարգում: Այս մասին հայտարարել է փոխվարչապետ Բյուլենտ Արընչը:
Փոխվարչապետը նշել է, որ Ֆրանսիայի Սահմանադրական խորհրդի որոշումը, որը անվավեր է համարել Օսմանյան կայսրությունում Ցեղասպանության փաստի ժխտումը քրեականացնող օրենքը, «ուրախալի» փաստ է համարվում: «Սակայն պատժամիջոցները կշարունակվեն, որպեսզի Նիկոլա Սարկոզին խորհրդարանի օրակարգում նորից չընդգրկի օրենքը», - Ասել է Արընչը, հաղորդում է ԻՏԱՌ-ՏԱՍՍ-ը:
Ինչպես ավելի վաղ գրել էր NEWS.am-ը, ցեղասպանությունների, այդ թվում` հայոց ցեղասպանության ժխտումը քրեականացնող օրինագիծը, որը հայտնի է նաեւ Բուայեի օրենք անվանումով, Ֆրանսիայի Ազգային ժողովում ընդունվել էր դեկտեմբերի 22-ին, վավերացվել Սենատի կողմից` հունվարի 23-ին:
Դրանից հետո ֆրանսիացի սենատորների մի խումբ օրենքը վիճարկել էր Սահմանադրական խորհրդում, որն էլ այն փետրվարի 28-ին ճանաչել էր հակասահմանադրական:
Իր հերթին Ֆրանսիայի նախագահ Նիկոլա Սարկոզին արդարադատության նախարարին հանձնարարել է օրինագծի նոր տեքստ պատրաստել` հաշվի առնելով Սահմանադրական խորհրդի դիտողությունները:
Դեռ նախորդ տարի խորհրդարանի ստորին պալատում օրինագծի քննարկումների ժամանակ Թուրքիան մի շարք սահմանափակումներ էր մտցրել Ֆրանսիայի հետ հարաբերություններում: Այսպես, դեկտեմբերին դադարեցվել են Ֆրանսիայի հետ քաղաքական, ռազմական եւ տնտեսական ոլորտներում ունեցած կապերը, հետաձգվել են քաղաքական խորհրդատվական բնույթի հանդիպումները, զորավարժությունները: Անկարան խոստանում է փուլ առ փուլ նոր պատժամիջոցներ կիրառել` կախված օրինագծի շուրջ իրավիճակի զարգացումից:
