Էներգակիրների դիմաց «Նաիրիտ գործարան» ՓԲԸ պարտքը 2011թ. վերջի դրությամբ կազմում է 8,991 մլրդ դրամ (մոտ 23,1 մլն դոլար): Այդ մասին NEWS.am-ի թղթակցին հայտնեցին ընկերության մամուլի ծառայությունից:
Մասնավորապես «Երեւանի ՋԷԿ-ին» ունեցած պարտքը կազմում է 6,592 մլրդ, «Հայաստանի էլեկտրացանցեր» ընկերության պարտքը` 1,061 մլրդ, «Հայռուսգազարդինը»` 1,338 մլրդ դրամ: 2010թ. ապրիլից գործարանը դադարեցրել է արտադրությունը:
Հիշեցնենք, որ համաձայն ընկերության հաշվետվության, 2010 թ-ին իրացված արտադրանքի ծավալը կազմել է մոտ 4,2 մլրդ դրամ: Ինչպես հայտնեցին գործարանի մամուլի ծառայությունից, արտադրանքի պաշարները գրեթե ամբողջությամբ իրացվել են, իսկ վաճառքը 2011թ-ին մեծ չի եղել:
Հաշվետվության մեջ նշվում է, որ զարգացման ծրագրի իրականացման համար գործարանին անհրաժեշտ է 400 – 500 մլն դոլար: Ինչպես հաղորդվել էր, ձեռնարկությունում ստուգումներ էին իրականացրել կառավարությանն առընթեր Պետեկամուտների կոմիտեն եւ Ֆինանսների նախարարության ներքին աուդիտի բաժինը`ձեռնարկության նոր օպերատորին նրա ֆինանսական վիճակի մասին տվյալներ ներկայացնելու համար:
Նշենք, որ Հայաստանի էներգետիկայի եւ բնական պաշարների նախարարությունը գործարանը կառավարղ ընկերություն է ընտրում: Հետաքրքրություն են դրսեւորել գերմանական CSC եւ ռուսաստանյան ITERA ընկերությունները: 2011թ. հոկտեմբերին գործարան են այցելել ITERA-ի ներկայացուցիչները` առաջարկելով անկախ ընկերության մասնակցությամբ համալիր աուդիտ իրականացնել:
«Նաիրիտ գործարան» ՓԲԸ գլխավոր բաժնետերը (բաժնետոմսերի 90%-ը) Մեծ Բրիտանիայում գրանցված Rhinoville Property Ltd UK-ն է, մնացած 10%-ը պատկանում է պետությանը` ի դեմս Էներգետիկայի եւ բնական պաշարների նախարարության (4,5%), «Հայգազպրոմ» ՓԲԸ-ի (3,6%) եւ «Երեւանի ՋԷԿ» ՓԲԸ-ի (1,9%):