Նովոլադոժյան ջրատարի նախագծի առիթով այսօր համագործակցության հուշագիր կստորագրեն Knightsbridge ընկերությունների խմբի ղեկավար, Հայաստանի նախկին վարչապետ Արմեն Սարգսյանը եւ Լենինգրադյան շրջանի նահանգապետ Վալերի Սերդյուկովը:
Նախագծի ընդհանուր արժեքը կկազմի 50 միլիարդ ռուբլի:
«Երկրամասը», հղում անելով «Դելովոյ Պետերբուրգ» թերթին, հայտնում է, որ տարածաշրջանը տվյալ նախագծի համար ներդրողների է փնտրել շուրջ 4 տարի:
Knightsbridge-ի գործընկերներն են համաշխարհային առաջատար ներդրումային եւ ապահովագրական ընկերությունները եւ կազմակերպությունները, այդ թվում Goldman Sachs-ը, Merrill Lynch-ը, Credit Suisse-ը եւ HSBC-ն: Նրա գրասենյակները եւ ներկայացուցչությունները գտնվում են Վիեննայում, Լոնդոնում, Փարիզում, Մոսկվայում, Բուդապեշտում, Վարշավայում, Կիեւում եւ Ալմաթիում:
Պետերբուգում հայկական սփյուռքի նախագահ Կարեն Մկրտչյանը թերթին պատմել է, որ Արմեն Սարգսյանը համաշխարհային մասշտաբի լուրջ գործարար է: Նա Լոնդոնում հայկական սփյուռքի ամենակարեւոր դեմքն է եւ աշխարհում ամենաազդեցիկ հայերից մեկը:
Ըստ թերթի տվյալների` Նովոլադոժյան ջրատարի նախագծի անհատական ներդրումների ծավալը կկազմի մինչեւ 30 միլիարդ ռուբլի, մնացած միջոցները շրջանը կհատկացնի իր բյուջեից եւ այն կհայցի դաշնայինից: