Բաքվում կայանալիք «Եվրատեսիլին» մասնակցելուց Հայաստանի հրաժարումը նորություն չէ, նման միջադեպեր եղել են: Այդ մասին BBC ռադիկոկայանին տված հարցազրույցում ասել է «Եվրատեսիլ երգի մրցույթ. պաշտոնական պատմություն» գրքի հեղինակ Ջոն Քենեդի Օ` Քոնորը:
Նա հիշեցրել է, որ դեռ 1969թ-ին Ավստրալիան հրաժարվել էր մասնակցել Մադրիդում կայանալիք Եվրատեսիլից, դա բացատրելով նրանով, որ մրցույթը «կազմակերպվել է Ֆրանկոյի ֆաշիստական ռեժիմի կողմից»:
Խոսելով երկու երկրների թշնամական հարաբերությունների մասին, Օ` Քոնորը հիշեցրել է, որ 2009թ-ին հայ մասնակցի օգտին քվեարկած ադրբեջանցիները
«հրավիրվել էին» անվտանգության ծառայություն:
«Կարծում եմ` Ադրբեջանը չպետք է մրցույթ ընդունի: Նույնպիսի կարծիք են հայտնել Amnesty Internationa-ի փորձագետները»,- ընդգծել է Օ` Քոնորը:
Նա նշել է, որ Ադրբեջանում վերջին շրջանում մարդու իրավունքների խախտման բազմաթիվ դեպքեր են գրանցվել, շատերը զրկվել են տնից եւ սեփականությունից մրցույթի նախապատրաստական աշխատանքների պատճառով:
Չնայած այն կարծիքին, թե շատերը ցանկանում են Բաքու գնալ` հատկապես պարզելու համար, թե ինչպիսին է այնտեղ իրավիճակն իրականում, Օ` Քոնորը կարծում է, որ դա նրանց չի հաջողվի:
«Նրանք բոլորին կներկայանան ժպտացող երջանիկ դեմքերով, թեեւ իրականությունն անհամեմատ տարբերվում է»,-եզրափակել է նա: