Երեւանի քաղաքապետի խորհրդական Ալբերտ Գեւորգյանը հանդիպել է Հայաստանում Չինաստանի դեսպանատան առեւտրատնտեսական հարցերով խորհրդական Գուան Գանգին եւ դեսպանատան առեւտրատնտեսական կապերի գրասենյակի 2-րդ քարտուղար Վան Ցզի Խունին: NEWS.am-ին Երեւանի քաղաքապետարանից հայտնեցին, որ ողջունելով հյուրերին` Ալբերտ Գեւորգյանը նշել է, որ հայ-չինական բարեկամական հարաբերությունները հիմք են հանդիսացել նաեւ երկու երկրների առեւտրատնտեսական կապերը ընդլայնելու եւ մի շարք ծրագրեր Երեւանում իրականացնելու համար: Քաղաքապետի խորհրդականը Երեւանի քաղաքապետ Տարոն Մարգարյանի անունից շնորհակալություն է հայտնել Չինաստանի կառավարությանն ու անձամբ Գուան Գանգին` նվիրատվության կարգով Երեւանին հատկացված շտապ օգնության մեքենաներ եւ չինական ավտոբուսներ տրամադրելու գործընթացին նպաստելու համար:
Գուան Գանգն իր հերթին շնորհակալություն է հայտնել սերտ համագործակցության համար եւ ընդգծելով, որ Հայաստանը hամարում է իր երկրորդ հայրենիքը, խոստացել է շարունակել նպաստել հայ-չինական բազմակողմ կապերի ամրապնդմանն ու այդ համատեքստում համատեղ նոր ծրագրեր իրականացնել:
Հայ-չինական առեւտրատնտեսական հարաբերությունների զարգացման եւ ամրապնդման, Հայաստանում եւ հատկապես Երեւանում բազմաթիվ տեխնիկական ծրագրեր իրականացնելու համար Գուան Գանգը պարգեւատրվել է Երեւանի քաղաքապետի շնորհակալագրով:
