Իտալիայում Հայաստանի դեսպան Ռուբեն Կարապետյանն, այսօր` մարտի 20-ին, հանդիպում է ունեցել Իտալիայի տարածաշրջանային գործերի, զբոսաշրջության եւ սպորտի նախարար Պիեռո Գնուդիի հետ /Piero Gnudi/, որի ընթացքում քննարկել նշված բնագավառներում հայ-իտալական համագործակցության խորացման հետ կապված հարցեր:
Հայաստանի ԱԳՆ մամուլի ծառայությունից NEWS.am-ին հայտնում են, որ
Դեսպանը նախարար Գնուդիին տեղեկացրել է այն մասին, որ վերջին տարիներին երկու երկրների միջեւ 2009թ. ի վեր օդային ուղիղ կապի հաստատումից հետո զգալիորեն մեծացել են զբոսաշրջության ծավալները:
Այս ընթացքում իտալացի զբոսաշրջիկների թիվը գրեթե եռապատկվել է` 2011թ. կազմելով Հայաստան այցելող ողջ զբոսաշրջիկների շուրջ 18 տոկոսը:
Դեսպանը տեղեկացրել է նաեւ, որ Իտալիայում ՀՀ դեսպանության հովանավորությամբ վերջին մեկ տարվա ընթացքում կազմակերպվել են զբոսաշրջության ոլորտի հայ-իտալական երկու համաժողովներ Վենետիկում եւ Կալյարիում, ինչպես նաեւ «Սուրբ Ղազարից մինչեւ Հայաստան» նախագծի շրջանակներում ս.թ. մարտի 30-ին Երեւանում նախատեսվում է անցկացնել «Հայաստան Զբոսարջության զարգացման հնարավորությունները» գործարար համաժողով:
Կողմերը կարեւորեցին ընթացիկ տարվա նոյեմբերին Իտալիայի Պեստումի հեղինակավոր 15-րդ միջազգային հնագիտական զբոսաշրջության ցուցահանդեսին Պատվավոր հյուրի կարգավիճակով Հայաստանի մասնակցությունը:
Զրուցակիցները քննարկեցին զբոսաշրջության ոլորտում իրավա-պայմանգային դաշտի ձեւավորման հնարավորությունները:
Հանդիպման ընթացքում երկուստեք կարեւորվեց Հայաստանի եւ Իտալիայի նահանգների ու քաղաքների միջեւ ապակենտրոնացված համագործակցության սերտացումը: Գոհունակությամբ արձանագրվեց, որ վերջին երկու տարվա ընթացքում համագործակցության վերաբերյալ փաստաթղթեր են ստորագրվել Իտալիայի եւ Հայաստանի 6 վարչատարածքային /մարզային եւ քաղաքային/ միավորների միջեւ:
Զրուցակիցների կողմից հատուկ ընդգծվեց սպորտի բնագավառում համագործակցության զարգացման համար առկա հնարավորությունները: Այս կապակցությամբ, Ռուբեն Կարապետյանը նախարար Գնուդիին հրավիրեց այցելել Հայաստան` հոկտեմբերի 9-ին ֆուտբոլի աշխարհի առաջնության համար Երեւանում կայանալիք Հայաստան-Իտալիա խաղը դիտելու նպատակով:
