Վրաստանի բնակչության մեծամասնությանը դուր չի գալիս Ռուսաստանի հետ ունեցած ներկա հարաբերությունը: Նման արդյունքի են հանգեցրել Հետազոտական ռեսուրսների կովկասյան կենտրոնի ուսումնասիրությունները, որոնք կատարվել են ԱՄՆ-ի Ազգային ժողովրդավարական ինստիտուտի պատվերով:
Փետրվարի 22-ից մարտի 5-ն ընկած ժամանակահատվածում հարցաքննվել է 3,161 մարդ Վրաստանի տարբեր շրջաններում` վրացական բարեփոխումների, ներքին քաղաքականության եւ սոցիալական խնդիրների, ինչպես նաեւ Վրաստանի արտաքին քաղաքականության նկատմամբ նրանց կարծիքը եւ վերաբերմունքը պարզելու նպատակով:
Հարցման համաձայն` բնակչության 88%-ը դժգոհ է Ռուսաստանի հետ հարաբերությունից: Ընդ որում, հարցվածների 49%-ը համաձայն են, որ Ռուսաստանը իրական եւ զգալի սպառնալիք է Վրաստանի համար, 30%-ը կարծում են, որ Ռուսաստանը իրական սպառնալիք է Վրաստանի համար, սակայն այն չափազանցրած են համարում, եւ հարցվածների միայն 8% -ը Ռուսաստանի մեջ սպառնալիք չեն տեսնում:
Վրաստանում հարցվածների 66%-ի համար ընդունելի է Ռուսաստանի հետ երկխոսություն սկսելու նախագահ Միխայիլ Սահակաշվիլիի կոչը` պայմանով, որ Ռուսաստանը հետ կանչի իր դեսպանատները Վրաստանից առանձնացած Աբխազիայից եւ Հարավային Օսիայից:
Հետազոտությունները նաեւ ցույց են տվել, որ Վրաստանի բնակչության մեծամասնությունը կողմ է ՆԱՏՕ մտնելու երկրի ձգտմանը, հաղորդում է BBC-ի ռուսական ծառայությունը:
Հարցման համաձայն` 70%-ը կողմ է Հուսիսատլանտյան դաշինքին անդամակցելուն: Հարցվածների ավելի մեծ` 74% -ը հավանություն է տվել ԵՄ մտնելու Վրաստանի կառավարության նպատակին:
