Կանադայի հայ երիտասարդական ֆեդերացիան մարտի 23 –ին հանրահավաք կկազմակերպի Օտտավայում Ադրբեջանի դեսպանատան դիմաց: Հարյուրավոր կանադահայեր իրենց մտահոգությունը կհայտնեն հայերի նկատմամբ Ադրբեջանի շարունակական ագրեսիայի կապակցությամբ, գրում է «Asbarez»-ը:
Ադրբեջանի կառավարությունը ակտիվորեն շարունակում է թշնամական վերաբերմունքը հայերի նկատմամբ` 1980-ականների վերջին ջարդերից մինչեւ Լեռնային Ղարաբաղի հետ հրադադադրի ռեժիմի խախտման սպառնալիքները: Վերջին շրջանում Նախիջեւանում հայկական խաչքարերի նպատակաուղղված ոչնչացումն աշխարհին ապացուցեց, որ Ադրբեջանն ակտիվ քայլեր է ձեռնարկում իր երկրից հայերի հետքն ամբողջությամբ մաքրելու համար:
Հանրահավաքում կնշվի նաեւ Սումգայիթում հայերի ջարդերի 24-րդ տարելիցը: Սումգայիթի ողբերգությունը եւ Ադրբեջանում 1988–1991թթ. դրանց արյունալի կրկնությունը հանգեցրեց 450 հազ. հայազգի բնակիչների վտարման:
Կանադայի հայ համայնքը կարծում է, որ տարածաշրջանում խաղաղությունը պետք է կառուցվի ճշմարտության ամուր հիմքի վրա եւ Լեռնային Ղարաբաղի անկախությունը համընդհանուր ճանաչում պետք է ստանա: Բացի այդ, աշխարհի երկրների կառավարությունների ղեկավարները պետք է դատապարտեն Ադրբեջանին` կրոնական անհանդուրժողականության, ագրեսիայի եւ Կովկասը մշտապես ապակայունացնելու համար:
