Տիգրան Կարապետյանը կմասնակցի 2013թ. նախագահական ընտրություններին: Այս մասին, այսօր` մարտի 27-ին, մամուլի ասուլիսում հայտարարել է Կարապետյանն ինքը:
Լրագրողների այն հարցին, թե նա արդյոք վայր կդնի՞ պատգամավորական մանդատը, եթե ունենա, Կարապետյանը նշել է. «Ի՞նչ կա դրա մեջ: Ես դիրքի, աշխատավարձի խնդիր չունեմ, բիզնես էլ չունեմ, որը պաշտպանելու կարիք լինի: Ինձ միայն ամբիոն է պետք եւ ժողովրդին օգնելու հնարավորություն»: Նա նաեւ նշել է, որ պատգամավոր չդառնլու դեպքում եւս կառաջադրվի նախագահական ընտրություններում: Իսկ խորհրդարանական ընտրություններին մասնակցում է «Եթե չընտրես, կպարտվես» կարգախոսով:
Նրա խոսքով` Ժողովրդական կուսակցությունը չի մասնակցում խորհրդարանական ընտրություններին, քանի որ արդյունքների կեղծման տեխնոլոգիան փոխվել է. «Ընտրակեղծիքներն արդեն ընտրատեղամասերում չեն արվում, միայն թվերն են ավելացվում:
Մալաթիա-Սեբաստիայում, օրինակ, խորացող արտագաղթի պայմաններում ընտրողների թիվն աճել է 5000-ով», - ընդգծել է նա:
Կարապետյանը նշել է, որ ի տարբերություն համամասնականի, մեծամասնական ընտրակարգով, հատկապես գյուղերում, դժվար է կեղծիքներ կատարելը:
Կարապետյանը հայտնել է, որ N17 ընտրատարածքում իր թեկնածությունը կաջակցի համամասնական կարգով սպասվելիք խորհրդարանական ընտրություններին համամասնական կարգով մասնակցող քաղաքական ուժերից մեկը: «Աջակցությունը փոխադարձ կլինի, սակայն դա դեռ վերջնական չէ, եւ հենց այդ պատճառով չեմ հրապարակի քաղաքական տվյալ ուժի անունը», - ընդգծել է նա: Հարցին, թե հնարավո՞ր է արդյոք, որ դա լինի կոալիցիոն «Բարգավաճ Հայաստան» կուսակցությունը, Կարապետյանը բացասական պատասխան է տվել` ընդգծելով, որ խոսքը քաղաքական ընդդիմադիր ուժի մասին է:
