Երեկ «Ժառանգություն» կուսակցությունը հայտարարություն էր տարածել, համաձայն որի՝ անգամ պաշտոնական տվյալներով Րաֆֆի Հովհաննիսյանն այս ընտրություններում ստացավ ավելի մեծ թվով ձայներ, քան 1998-ից ի վեր նախագահի որեւէ ընդդիմադիր թեկնածու ստացել էր: Այս կապակցությամբ ՀԺԿ քարտուղար Գրիգոր Հարությունյանը «Ժամանակ»թերթին ասել է, որ ոչ Րաֆֆի Հովհաննիսյանը, ոչ Ստեփան Դեմիրճյանը, ոչ Լեւոն Տեր-Պետրոսյանը չեն կարող համեմատվել Կարեն Դեմիրճյանի հետ:

«Նա հայտարարությունը կազմողներին պարզապես խորհուրդ տվեց զգույշ լինել իրենց արտահայտությունների եւ համեմատությունների մեջ: Նրա համոզմամբ՝ նման համեմատությունների անհրաժեշտություն բացարձակապես չկա: Քաղաքական գործչի կարծիքով՝ նման հայտարարությունները ոչ մի նպաստ չեն բերի ժողովրդական շարժմանը:

ՀԺԿ քարտուղարը գնահատում է հայ ժողովրդի համախմբվածությունը եւ համոզված է, որ «ոչ»-ն ուղղված է գործող վարչախմբի դեմ՝ կրկին խորհուրդ տալով համեմատություններ չանել:

Ըստ նրա՝ այն քաղաքական ուժերը, ովքեր մտադիր են աջակցել այսօր ձեւավորված շարժմանը, չեն աջակցում Րաֆֆի Հովհաննիսյանին, նրանք աջակցում են ժողովրդական շարժմանը, նրանք աջակցում են, որպեսզի երկրում սահմանադրական կարգը վերականգնվի: «Կլինի Րաֆֆի Հովհաննիսյան, Ստեփան Դեմիրճյան, Լեւոն Տեր-Պետրոսյան կամ որեւիցե այլ մեկը, սա է հիմնական խնդիրը՝ երկրում պետք է վերականգնվի սահմանադրական կարգը, մարդկանց քվեն, ձայնն իր նպատակին պետք է հասնի»,- ասաց ՀԺԿ քարտուղարը»,- մեջբերում է «Ժամանակը»։