«Հայկական ժամանակ» թերթը գրում է. «Երեկ կապի եւ տրանսպորտի նախարար Գագիկ Բեգլարյանից հետաքրքրվեցինք, թե ինչպե՞ս կազդի Վրաստանի՝ Եվրամիության հետ ասոցացման համաձայնագրի ստորագրումը Հայաստանի ու Վրաստանի միջեւ բեռնափոխադրումների վրա:
Ըստ մամուլի հրապարակումների, Վրաստան կատարած այցի ժամանակ Սերժ Սարգսյանը այդ հարցը քննարկել է Վրաստանի նախագահ Գեորգի Մարգվելաշվիլիի հետ:
Ի պատասխան Բեգլարյանն ասաց, որ նման հարց չի քննարկվել, եւ ասոցացման համաձայնագրի ստորագրմամբ խնդիրներ չեն առաջանում. «Բոլորովին չկա նման բան: Ես մասնակցել եմ այդ պետական այցին, եղել եմ Սերժ Սարգսյանի հետ: Դա խնդիր չի»,- ասաց Բեգլարյանը:
Նախարարի այս լավատեսական վստահեցումները, սակայն, այնքան էլ համոզիչ չեն թվում: Պարզապես ներկայումս այդ հարցը չի քննարկվում եւ չի շոշափվում միայն այն պատճառով, որ առայժմ հայտնի չէ, թե ինչպես պետք է կանոնակարգվի բեռների շրջանառությունը ՄՄ անդամ հանդիսացող Հայաստանի եւ ՌԴ-ի միջեւ երրորդ երկրների տարածքով: Ավելի մեծ է հավանականությունը, որ Վրաստանի՝ Եվրամիության հետ ավելի խոր ինտեգրման եւ Հայաստանի՝ ՄՄ լիարժեք անդամ դառնալուց հետո ՀՀ եւ ՌԴ միջեւ տարանցիկ բեռնափոխադրումների ոլորտում որոշակի բարդություններ առաջանան»։
Առավել մանրամասն` թերթի այսօրվա համարում