Արտաքին քաղաքականության եւ անվտանգության հարցերով Եվրամիության բարձրագույն ներկայացուցիչ Քեթրին Էշթոնի հանդիպումը Իրանի ազգային անվտանգության բարձրագույն խորհրդի քարտուղար Սաիդ Ջալալի հետ` Իրանի միջուկային ծրագրի հարցով միջնորդների մասնակցությամբ, անցել է կառուցողական, հարգալից մթնոլորտում, կողմերը փոխընդունելի բանակցային լուծումների որոնման պատրաստակամություն են հայտնել: Այս մասին նշվում է Ռուսաստանի արտգործնախարարության հայտարարության մեջ` Ստամբուլում կայացած Իրանի եւ «վեցյակի» հանդիպման վերաբերյալ, տեղեկացնում է «ՌԻԱ Նովոստին»:
Հանդիպման մասնակիցները վերսկսված երկխոսությանը կայուն եւ հետեւողական զարգացում հաղորդելու պատրաստակամություն են հայտնել` ՄԶՉՊ դրույթների եւ փուլային ու փոխադարձության համաձայնեցված սկզբունքների հիման վրա: Բացի այդ, պայմանավորվածություն է ձեռք բերվել բանակցությունների հաջորդ փուլը մայիսի 23-ին Բաղդադում անցկացնելու վերաբերյալ:
Իր հերթին Քեթրին Էշթոնը հայտարարել էր, որ կողմերի հանդիպումը օգտակար եւ կառուցողական է համարում: