Վրաստանի մարդու իրավունքների նախկին պաշտպան Սոզար Սուբարին զբաղեցրել է օրերս միլիարդատեր Բիձինա Իվանիշվիլիի նախաձեռնությամբ հիմնադրված «Վրացական երազանք` դեմոկրատական Վրաստան» ընդդիմադիր կուսակցության քաղաքական քարտուղարի պաշտոնը:
Նման որոշում կուսակցության քաղխորհուրդը կայացրել է առաջին նիստում:
Ինչպես հաղորդում է «Նովոստի Գռուզիան», կուսակցության քաղաքական քարտուղար է ընտրվել Սոզար Սուբարին, գործադիր քարտուղար` Թբիլիսյան պետհամալսարանի տնտեսական գիտությունների դոկտոր Նոդար Խադուրին: Արտաքին քաղաքական ուղղությունը կգլխավորի Վրաստանի ԱԳՆ-ի նախկին ղեկավար Թեդո Ջափարիձեն, տարածաշրջանային քարտուղար կլինի Ազգային ֆորումի նախկին անդամ Գելա Խվեդելիձեն:
Հիշեցնենք, որ վրացի միլիարդատեր Բիձինա Իվանիշվիլիի կողմնակիցները նիստում քվեարկել են «Վրացական երազանք` դեմոկրատական Վրաստան» քաղաքական միավորման ստեղծման օգտին: Նիստում հաստատել են կուսակցության քաղաքական խորհուրդը, որում ընդգրկվել է 11 մարդ:
Անձամբ Իվանիշվիլին, որը զրկվել է վրացական քաղաքացիությունից, չի կարող գլխավորել կուսակցությունը, այդ պատճառով էլ նրա առաջնորդ համագումարն ընտրել է իրավապաշտպան եւ փաստաբան Մանանա Կոբախիձեին:
