Ձերբակալված սահմանապահը խոստովանել է Ալմաթիի շրջանի ուղեկալում 14 ծառայակիցների սպանությունը: Այդ մասին, այսօր` հունիսի 7-ին, ճեպազրույցում հայտնել է Ղազախստանի գլխավոր դատախազության պաշտոնական ներկայացուցիչ Նուրդուալետ Սուինդիկովը:
Ըստ նրա` սահմանապահն սկզբում կրակել է ծառայողների վրա, իսկ հետո այրել է կայանը:
«Դրդապատճառ են հանդիսացել ներքին հակասություններն ու գիտակցության մթագնումը», - ասել է դատախազը:
Հանցագործությունը կատարվել է մայիսի 28-ի առավոտյան, երբ բոլորը քնած են եղել:
Ըստ նրա` հետաքննությունը ստուգում է Չելախի ցուցմունքները, տարվում են մի շարք փորձաքննություններ: Սահմանապահն արդեն ձերբակալվել է, եւ նրան մեղադրանքներ են ներկայացվել: Չելախի մոտ հայտնաբերվել են քաղաքացիական համազգեստ, նոթբուք, որոշ զոհվածների բջջային հեռախոսներ: «Համախոհների առկայությունը նա հերքում է», - ասել է Սուիդնիկովը, հաղորդում է «Նովոստի Ղազախստանը»:
Չելախից բացի ձերբակալվել է նաեւ սահմանապահ ջոկատի ղեկավար Սարի Բոքթեր Ալեքսեյ Ֆոմինը: Նա մեղադրվում է մայիսի 28-30-ի դեպքերի միտումնավոր քողարկման մեջ` կապված սահմանապահ ջոկատից բացակայությամբ:
Սուինդիկովը նաեւ հայտնել է, որ փորձաքննությունը չի հաստատել, որ Ղազախստանում զոհված սահմանապահները եղել են ալկոհոլային կամ թմրանյութային ազդեցության տակ: