Իրաքում, այսօր` հունիսի 7-ին, մահապատժի են ենթարկել 2003 թվականին Իրաքի գահընկեց արված նախագահ Սադամ Հուսեյնի անձնական նախկին քարտուղարին: Աբեդ Համիդ Հմուդի մահապատիժն իրագործվել է դատավճռի կայացումից 2 տարի անց:
Իրաքի արդարադատության նախարարությունում հայտնել են, որ իրագործվել է 1991 թվականին քրդերի ցեղասպանության մեղավոր Աբեդ Համիդ Հմուդի մահապատժի վերաբերյալ դատավճիռը:
Ինչպես հիշեցնում է «Իզվեստիան», 1991 թվականի ձմռանն Իրաքում պատերազմ էր սկսվել Պարսից ծոցում: 5 շաբաթ օդային ռմբակոծություններից եւ քառօրյա ցամաքային պատերազմից հետո Քուվեյթն ազատագրվել էր Իրաքի բռնագրավումից` ԱՄՆ-ի գլխավորած միջազգային կոալիցիոն ուժերի կողմից: Այդ նույն տարվա մարտին քրդերն Իրաքի հյուսիսում ապստամբություն էին բարձրացրել: Մարդասիրական օգնության համար Իրաքի հյուսիսային շրջաններում միջազգային զորքեր էին մտցվել:
Ըստ մեղադրող կողմի` իրաքյան զորքերի կողմից սեպարատիստների ապստամբությունը ճնշելու գործընթացում սպանվել էր շուրջ 100 հազար մարդ: