ԱՄՆ-ի ոստիկանությունը հայտնաբերել է Պաբլո Պիկասոյի վիմագրությունը, որը գողացվել էր ամերիկյան բանտում պատիժ կրող Ուկրաինայի նախկին վարչապետ Պավել Լազարենկոյի առանձնատնից, գրում է «ՌԻԱ Նովոստին»` վկայակոչելով AP-ին:
Հիշեցնենք, տեղացի դեռահասները տանը խնջույք են կազմակերպել, որի ընթացքում մի քանի սենյակներ էին թալանվել: Խնջույքից հետո առանձնատնից անհետացել էր Պաբլո Պիկասոյի վիմագրությունը, որը նվազագույնը 30 հազար դոլար արժե:
Ըստ լրատվամիջոցների` նախկին վարչապետի առանձատնից կորել էին նաեւ արծաթե զարդեր եւ էլեկտրոնային տեխնիկա:
Ոստիկանության ներկայացուցիչ Էրիկ Ռիդելը հայտարարել է, որ անհայտ անձինք վիմագրությունը հենել էին քաղաքային ցանկապատերից մեկին` մտածելով, որ հեշտ նկատելի կլինի:
ԱՄՆ-ի դատախազությունը 2000-ականների սկզբին Ուկրաինայի նախկին վարչապետ Պավել Լազարենկոյին շորթման, մեքենայության, 280 մլն դոլարի լվացման մեղադրանք էր ներկայացրել: 2006թ. օգոստոսին Լազարենկոն դատապարտվել էր 9 տարվա ազատազրկման եւ 10 մլն դոլար տուգանքի: