Վրաստանի ավելի քան 9 հազար քաղաքացիներ ապօրինի հիմունքներով բնակվում են Ռուսաստանում: Այդ մասին լրագրողներին հաղորդել է ՌԴ Դաշնային միգրացիոն ծառայության ղեկավար Կոնստանտին Ռոմոդանովսկին:
«Մենք կգտնենք այդ մարդկանց եւ նրանց վերաբերյալ որոշումներ կկայացնենք. Կա’մ միգրացիոն ծառայություն, կա’մ դատարան: Կարգուկանոնը մենք պետք է ապահովենք», - նշել է նա:
Պաշտոնյան նաեւ մեկնաբանել է Վրաստանի քաղաքացիների բողոքը մարդու իրավունքների Եվրոպական դատարանում` Ռուսաստանից ապօրինի արտաքսման կապակցությամբ: Համապատասխան հայցը դատարանը պետք է քննարկի հունիսի 13-ին:
«Եթե խախտվել է երկրում գտնվելու ռեժիմը, եւ դրա համար քաղաքացին հայրենիք է ուղարկվել, այդտեղ ոչ մի ահավոր բան չեմ տեսնում: Նման փորձ գոյություն ունի բազմաթիվ երկրներում», - ասել է ԴՄԾ-ի ղեկավարը, հաղորդում է «ՎԶԳԼՅԱԴ»-ը:
