Երբ տնտեսվարողի բիզնես ակնկալիքները չեն արդարացվում, ապա տրամաբանական չէ խնդիրը պայմանավորել գազի գործոնով, այլ անհրաժեշտ է արդյունավետ կառավարման ուղիներ մշակել: Այդ մասին նշեցին «ՀայՌուսգազարդ» ընկերությունից` պատասխանելով NEWS.am-ի դիտարկմանը, թե ջերմոցային տնտեսությունների ասոցիացիայի ներկայացուցիչների կողմից օրերս հայտարարություններ են հնչել այն մասին, թե ջերմոցային տնտեսությունները ստիպված են դադարեցնել իրենց աշխատանքը գազամատակարարման անընդունելի պայմանների եւ «ՀայՌուսգազարդ»-ին ունեցած պարտքերի պատճառով` մատնանշելով բնական գազի սակագնի բարձրացումը, գազի անբավարար որակը եւ այլն:
«Հարցի առնչությամբ նախ նշենք, որ թե ջերմոցային տնտեսությունները, թե «ՀայՌուսգազարդ» ընկերությունը տնտեսվարող սուբյեկտներ են եւ իրենց գործունեության տիրույթում առաջնորդվում են բացառապես բիզնեսի կառավարման նորմերով: Եւ երեւի թե հարկ չկա լրացուցիչ մանրամասնելու, որ «ՀայՌուսգազարդ»-ը` որպես տնտեսվարող սուբյեկտ, այլ տնտեսվարողների բիզնեսի նկատմամբ սոցիալական պատասխանատվություն չի կրում: Ավելին, ելնելով շուկայական օրենքի պահանջներից, պարտավոր է բացառել սպառողների նկատմամբ խտրական մոտեցումը եւ հավասար դաշտ ապահովել բոլորի համար: Տնտեսական տարբեր գործոններով պայմանավորված հնարավոր է շուկան նվազեցնելու ռիսկ արձանագրվի, սակայն առաջին հերթին ընկերությունն ունի իր ֆինասական կայունությունն ապահովելու պարտականություն, հետեւաբար մատակարար-սպառող պայմանագրային հարբերություններում հուսալի ու անվտանգ գազամատակարարումից բացի առկա է նաեւ ֆինանսական կարգապահության պահանջ:
Ինչ վերաբերում է մենատնտեսների համար անընդունելի պայմաններին` բարձր սակագնին ու մատակարավող գազի որակին, ապա Ընկերությունը բազմաթիվ անգամ այս հարցերի հետ կապված մեկնաբանություններ ներկայացրել է. գազի գինը պայմանավորված է էներգակիրների միջազգային շուկայի, ինչպես նաեւ սոցիալ –տնտեսական քաղաքականության գործոններով, իսկ մատակարարվող բնական գազի որակական հատկանիշները համապատասխանում են գործող միջպետական ստանդարտներին, որի հետ կապված «ՀայՌուսգազարդը » պատրաստ է գազի որակի համատեղ փոխստուգումներ իրականացնել ցանկացած տեղում ցանկացած ժամանակ:
Եվ ընդհանրապես, երբ տնտեսվարողի բիզնես ակնկալիքներ չեն արդարացվում, ապա տրամաբանական չէ խնդիրը պայմանավորել գազի գործոնով, այլ անհրաժեշտ է արդյունավետ կառավարման ուղիներ մշակել»,- ասված է ընկերության պատասխանում:
