Եգիպտոսի զինված ուժերի Գերագույն խորհուրդը, որը երկիրը ղեկավարում է Հոսնի Մուբարաքի պաշտոնանկությունից հետո, չի շտապում հրաժեշտ տալ իշխանությանը` մոռանալով նախքան նոր նախագահի ընտրությունները տված խոստումը: Պաշտոնական արդյունքները դեռ չեն հայտարարվել, իսկ խորհուրդը ժամանակավոր Սահմանադրություն է հրապարակել, որում բանակը լայն իրավասություններ ունի, որոնք սահմանափակում են ապագա նախագահի լիազորությունները:
Մասնավորապես, նախագահը զրկվում է գերագույն հրամանատարի պաշտոնից: Նա չի կարող պատերազմ հայտարարել եւ հաշտություն կնքել: Միաժամանակ բանակն իրավունք ունի վերահսկել բյուջետային քաղաքականությունը:
Բացի այդ, գործադիր իշխանության գործոռույթները, նախքան խորհրդարանի ձեւավորումը, անցնում է բանակին:
Եգիպտոսում եւ դրա սահմաններից դուրս բանակային հրամանատարության նախաձեռնությունը ընդունել են իբրեւ ռազմական հեղաշրջում, գրում է NEWSru.co.il-ը:
Հիշեցնենք, թեեւ Եգիպտոսի նախագահական ընտրությունների պաշտոնական արդյունքները կհայտարարվեն միայն հունիսի 21-ին, «Մահմեդական եղբայրների» թեկնածու Մուհամեդ Մուրսին արդեն հայտարարել է իր հաղթանակի մասին: Ավելի վաղ նա նոր հեղափոխություն էր խոստացել արդյունքները կեղծելու դեպքում, այլ խոսքով` իր չընտրվելու դեպքում:
Ի տարբերություն ընտրազանգվածի` զինվորականները պաշտպանում են Մուրսիի մրցակից, երկրի նախկին վարչապետ Ահմեդ Շաֆիքին:
Երկու ուժերի հակասությունը նոր հակամարտության կհանգեցնի, վստահ են փորձագետները: