Պարզվել է, որ Գարեգին Նժդեհի փողոցի թիվ 9ա շենքից ստացված ինքնասպանության փորձի մասին ահազանգը կեղծ է եղել:
Հիշեցնենք, որ այսօր` հուլիսի 5-ին, ժամը 10.48-ին ահազանգ էր ստացվել, որ Երեւանի Գարեգին Նժդեհի փողոցի թիվ 9ա շենքի 46-րդ բնակարանից (4-րդ հարկ) քաղաքացին ինքնասպանության փորձ է ուզում կատարել:
Դեպքի վայր էին մեկնել հատուկ փրկարարական ջոկատը եւ ՃԿԿ օպերատիվ խումբը` պարամեդիկներով:
Տեղում պարզվել է, որ Գերմանիայի դաշնային հանրապետության քաղաքացի` 27-ամյա Իրինա Տիմերմանը հանգստանալու համար նստել է 4-րդ հարկի պատշգամբին եւ ոտքերը կախել ցած: Երբ փրկարարները հասել են դեպքի վայր, զարմացած կինն ասել է, որ ինքնասպանություն գործելու մտադրություն չունի, պարզապես նստել է պատշգամբում:
Նա նշել է, որ իր երկրում նման կերպ պատշգամբում նստելը սովորական բան է, ինչը սակայն անհանգստացրել է երեւանցիներին, որոնք էլ ահազանգել են ԱԻՆ փրկարար ծառայություն:
