Հայաստանի Կարմիր խաչի ընկերությունը փախստականների աջակցության եւ ինտեգրման ծրագիր է իրականացնում` ՄԱԿ-ի Փախստականների գերագույն հանձնակատարի գրասենյակի ֆինանսական աջակցությամբ:
Ինչպես NEWS.am-ի թղթակցին հայտնեց ծրագրի համակարգող Նառա Հարությունյանը, ծրագիրը մեկնարկել է հունվարին եւ կավարտվի այս տարվա դեկտեմբերին, չնայած որ ՄԱԿ-ի ՓԳՀ գրասենյակի հետ համագործակցությունը արդեն մոտ 10 տարի շարունակվում է:
Ծրագրի շրջանակում ՀԿԽԸ-ում գրանցված հայտատուների` ապաստան տալու խնդրանքին ի պատասխան տեղեկացվում է դրա տրամադրման կարգի մասին, կազմակերպվում են հայոց լեզվի, համակարգչային դասընթացներ, տրվում է աշխատանքի տեղավորման մասին տեղեկություն, իրականացվում է հատուկ կացարանների մոնիտորինգ, ծայրահեղ կարիքի մեջ գտնվողներին մարդասիրական օգնություն է ցուցաբերվում, անհրաժեշտության դեպքում նրանց ուղարկում են գործընկեր կազմակերպությունների մոտ: Իրականացվում են նաեւ միջոցառումներ` ուղղված փախստականների ինտեգրմանը:
Ծրագրի համակարգողի խոսքով` ընթացիկ տարվա սկզբից համակարգչային դասընթացների է մասնակցել 145 փախստական: Եւս 29 հայտատուներ եւ փախստականներ տեղեկատվական աջակցություն են ստացել: