Բաքվում օգոստոսի 18-ին կայացած ցույցի մասնակիցները ազատ եւ արդար ընտրությունների անցկացում են պահանջել:
«Իլհամ Ալիեւն ընտրություններում չի կարող հաղթել մտավորականին: Եթե իշխանություններն արդար պայքարից են խոսում, թող ազատ ընտրություններ անցկացնեն եւ տեսնենք, թե ով կհաղթի», - ասել է «Բաց հասարակություն» կուսակցության ղեկավար Սուլահադդին Աքփերը, գրում է contact.az-ը:
Ադրբեջանի ժողովրդական ճակատ կուսակցության ղեկավար Ալի Քերիմլին նշել է, որ Ազգային խորհրդում ներկայացված են հասարակության բոլոր խավերը, եւ միասնական թեկնածուն Ռուստամ Իբրահիմբեկովն է: «Մենք արդար եւ ազատ ընտրություններ ենք պահանջում: Եթե ընտրությունները ազատ լինեին, իշխանությունները չէին համարձակվի ասել, թե կքանդեն եւս 60 հազար քաղաքացիների տներ», - ասել է Քերիմլին: Նրա խոսքով` ներկա վարչակարգը ոչնչացնում է երկրի կրթությունն ու առողջապահությունը, թալանում ժողորդական հարստությունները: Նա ընդգծել է երկրում իրավիճակի փոփոխության անհրաժեշտությունը, սակայն ԱԺՃԿ-ն դրան կհասնի խաղաղ ճանապարհով:
Դրանից հետո ցույցի երիտասարդ մասնակիցները գոչել են` «Իլհամ, հեռացիր»: Այդ կոչերն ամեն անգամ հնչելիս տիբունայում անջատել են էլեկտրամատակարարումը:
Ցույցն ավարտվել է բանաձեւի ընդունմամբ. պահանջել են ապահովել ազատ եւ արդար ընտրություններ, ազատել քաղբանտարկյալներին, պայմաններ ստեղծել Իբրահիմբեկովի` երկիր վերադառնալու եւ նախագահի թեկնածու առաջադրվելու համար:
Բանաձեւում պահանջել են նաեւ, որպեսզի պետության ղեկավարը բացատրություն տա իր ընտանիքի անդամների օֆշորային գործարքների մասին, պատժի կոռումպացված պաշտոնյաներին եւ դադարեցնի սեփականության իրավունքների խախտումները:
Ցույցի ընթացքում ոստիկանները մի խումբ կանանց են ձերբակալել` զինվորների մայրերի, որոնց զավակները զոհվել են բանակում` ոչ ռազմական գործողությունների պայմաններում: Նրանց ավտոբուս են նստեցրել եւ տարել: Նրանց մեղքը եղել է իրենց որդիների նկարներով ցույցին մասնակցելը: