Հայաստանի նախկին արտգործնախարար, ԱԺ ԲՀԿ խմբակցության անդամ Վարդան Օսկանյանի որդին՝ Արա Օսկանյանը եւ նրա ընկերը՝ Վահագնը առանց բժշկի նշանակման թմրամիջոցներ գործածելու համար ենթարկվել են վարչական պատասխանատվության: NEWS.am-ի թղթակցին ոստիկանության լրատվական ծառայությունից հայտնեցին, որ նշանակված փորձաքննության դրական եզրակացության հիման վրա՝ որոշում է կայացվել երկուսին էլ Վարչական իրավախախտումների վերաբերյալ օրենսգրքի 44-րդ հոդվածի 2-րդ կետի 1-ին մասի հատկանիշներով (առանց բժշկի նշանակման թմրամիջոցներ կամ հոգեմետ նյութեր գործածելը): Նրանք տուգանվել են 200 հազար դրամի չափով:
Ավելի վաղ NEWS.am-ը հայտնել էր, որ Խանջյան փողոցում գտնվող բարի մոտից՝ թմրամիջոցներ օգտագործելու կասկածանքով Կենտրոնի ոստիկանությունը բերման է ենթարկել ՀՀ արտաքին գործերի նախկին նախարար Վարդան Օսկանյանի որդուն՝ Արա Օսկանյանին՝ ընկերոջ հետ միասին։
«Փաստինֆո»-ի հավաստի տեղեկությունների համաձայն՝ Օսկանյանի մոտ ոչինչ չի հայտնաբերվել, փոխարենն ընկերոջ՝ ոմն Վահագի մոտ հեռախոսի գրպանչիկից թափվել է ինչ-որ փոշի, որի ծագումնաբանությունը պարզելու համար նշանակվել է փորձաքննություն։ Դեպքի առթիվ առայժմ քրեական գործ չկա հարուցված, այլ նախապատրաստվում են նյութեր։ Բերման ենթարկվածներն ազատ են արձակվել։ Կայքի ունեցած տեղեկություններով՝ Ա.Օսկանյանի անունը շրջանառվում է նաեւ թմրամիջոցների ապօրինի շրջանառության վերաբերյալ այլ գործով եւս։
Ոստիկանությունից NEWS.am-ի թղթակցին հայտնեցին, որ Մոսկովյան 31 հասցեից մոտից թմրանյութեր պահելու եւ օգտագործելու կասկածանքով բերման է ենթարկվել երկու հոգի, նշանակվել է փորձաքննություն:
