Իրաքի հետ սահմանակից թուրքական Հաքյարի քաղաքում երկու ցեղախմբերի միջեւ վեճը տեղական իշխանություններին հարկադրել է պարետային ժամ սահմանել:
Քաղաքում լարվածությունը սկսվել է հուլիսի 19-ին, քրդական Էրտոշի եւ Պինյանիշի ցեղախմբերից չորս երիտասարդների միջեւ բախումից հետո: Նրանք հանդիպել են Հաքյարիի կենտրոնական զբոսայգիներից մեկում եւ սկսել վիճել: Վեճի պատճառը դեռեւս հայտնի չէ, սակայն նրանց տարաձայնություններն արագորեն երկու ցեղերի բազմաթիվ անդամների է հավաքել: Երեկոյան առաջին արյունն է թափվել: Էրտոշիի անդամները ներխուժել են Պինյանիշի ցեղից Մուսթաֆա Էրի տուն: Էրին մորթել են, իսկ նրան որդին վիրավորվել է:
Այս միջադեպն էլ զանգվածային անկարգությունների եւ բախումների պատճառ է դարձել: Ցեղախմբերի անդամները սկսել են ծեծել միմյանց, հակառորդի ուղղությամբ քարեր նետել, ավտոմեքենաներ ջարդել: Հաքյարիի կենտրոնը, ըստ մամուլի, մարտական գործողությունների իսկական դաշտի էր վերածվել:
Բռնության սրումն ու հրազենի զանգվածային կիրառումը թույլ չտալու համար քաղաք ոստիկանության եւ ժանդարմերիայի լրացուցիչ ուժեր են բերվել՝ թեթեւ զրահատեխնիկայով եւ ջրցան մեքենաներով: Ուժայիններն անկարգություններին վերջ են դրել արցունքաբեր գազի եւ ջրցան մեքենաների օգնությամբ՝ փորձելով բաժանել հակառակորդներին:
ИТАР-ТАСС-ի փոխանցմամբ, քաղաքում շրջում են ոստիկանության հատուկ ջոկատայինները, փողոցներում զրահապատ եւ ջրցան մեքենաներ են տեղակայված:
