Եվրասիական տնտեսական միության մեջ Ղազախստանն ու Բելառուսն անելու են ամեն ինչ, որ Հայաստանի եւ Լեռնային Ղարաբաղի միջեւ մաքսակետ տեղադրվի։ Այսօր՝ սեպտեմբերի 11-ին, լրագրողների հետ զրույցում նման կարծիք հայտնեց Երեւանի մամուլի ակումբի նախագահ Բորիս Նավասարդյանը։
«Ղազախստանն ու Բելառուսը փորձելու են Եվրասիական տնտեսական միության շրջանակներում առաջ տանել Ադրբեջանի վարած քաղաքականությունը, այն է, որ Հայաստանից ԼՂՀ եւ հակառակ ուղղությամբ ապրանքն անցնի մաքսային կետով։ Այս ընթացակարգը պետք է գոնե ֆորմալ ձեւով պահպանվի։ Ինչ վերաբերվում է պրակտիկ ընթացակարգին, ապա դա կախված է, թե ինչպիսի կլինի հայ-ռուսական հարաբերությունները։ Այսինքն Ռուսաստանը կկարողանա՞ ասել՝ ինչ ասեմ, պիտի անեք։ Սա էլ ժամանակի ընթացքում պարզ կլինի»,- ասաց նա։
Բորիս Նավասարդյանի խոսքով՝ ամեն դեպքում Լեռնային Ղարաբաղի հարցն այս պահին օրակարգում չէ, այն թողնված է ապագայի համար. «Պարզ է, որ ԼՂՀ-ն չի լինելու Եվրասիական տնտեսական միության մեջ, նույնիսկ իշխանության ներկայացուցիչներն են այդ մասին անուղղակի հայտարարել։ Թե ինչ է լինելու Հայաստանի եւ Լեռնային Ղարաբաղի սահմանին, անորոշ է»։
Նշենք, որ Հայաստանի՝ ԵՏՄ-ին անդամակցելու հարցի ձգձգումը շատ քաղաքական վերլուծաբաններ կապում են հենց ՀՀ-ԼՂՀ սահմանին մաքսակետ տեղադրելու հետ։ Շատերը համոզված են, որ Ռուսաստանը Հայաստանին ստիպում է մաքսակետ տեղադրել սահմանին։
Հիշեցնենք, որ Եվրասիական տնտեսական միությանը Հայաստանի միացման մասին պայմանագրի ստորագրումը ծրագրվում է հոկտեմբերի 10-ին՝ ԵՏՄ երկրների առաջնորդների հանդիպման ժամանակ: