Մոսկվայի «Հոլոքոստ» կենտրոնի կողմից հայտարարված նկարների մրցույթում, որը տեղի կունենա նոյեմբերի 1-ին, պարտադիր երկու հատուկ ուղղություն կլինի՝ Հոլոքոստ եւ Հայոց ցեղասպանություն: Այդ մասին այսօր՝ հոկտեմբերի 18-ին, Հայոց ցեղասխպանության ինստիտուտ-թանգարանում նշված գրքի շնորհանդեսի ժամանակ հայտարարեց «Հոլոքոստ» կենտրոնի համանախագահ, Ռուսաստանի պետական հումանիտար համալսարանի պրոֆեսոր Իլյա Ալտմանը:
«Մենք արդեն 15 տարի շարունակ դպրոցականների եւ ուսանողների համար Հոլոքոստի թեմայով մրցույթներ ենք անցկացնում: Երեկ մեզ ներկայացրին Հոլոքոստի թեմային նվիրված հայ երեխաների հիանալի նկարները: Հավանաբար կան նաեւ Հայոց ցեղասպանության թեմային առնչվող նկարներ: Կարծում եմ, որ նոյեմբերի 1-ին նախատեսված մրցույթում պարտադիր երկու ուղղություն կլինի. Հոլոքոստ եւ Հայոց ցեղասպանություն», - նշեց Իլյա Ալտմանը:
Նրա խոսքով՝ սա Հայաստանի դպրոցականներին եւս հնարավորություն կտա մասնակցել Մոսկվայում անցկացվող համաժողովներին: «Իսկ հայկական համալսարանների ուսանողներին հիանալի հնարավորություն կտա ընդգրկվել Ռուսաստանի պատվիրակության կազմում, որը մենք արդեն 10 տարի ուղարկում ենք Փարիզ՝ ՅՈՒՆԵՍԿՕ-ի շտաբ-բնակարանում ելույթ ունենալու համար», - հայտարարեց Իլյա Ալտմանը:
