![](img/news/25/48/56/default.jpg)
Հայաստանի ազգային վիճակագրական ծառայությունը հրապարակել է հունվարի տվյալները, որը Հայաստանի՝ ԵՏՄ անդամակցության առաջին ամիսն է:
Մեր երկրի տնտեսության համար կանխատեսելի հետեւանքներից կարելի է առանձնացնել ավելացված արժեքի հարկի հավաքման նվազումը (հունվարին այն նվազել է 4,4 տոկոսով): Դա հիմնականում կապված է ԵՏՄ երկրներին ներկրվող ապրանքների համար ԱԱՀ-ի վճարման հետաձգման հետ: Մինչ այդ այդ երկրներից ներմուծվող ապրանքների համար ԱԱՀ-ն գանձվում էր հենց սահմանին:
Արդյունքում բյուջեի մուտքերը ԱԱՀ-ի գծով այս տարվա հունվարին կրճատվել են նախորդ տարվա հունվարի համեմատ ավելի քան 1,5 մլրդ դրամով: Այս բացը լրացվել է այլ հարկերի եկամուտների հաշվին:
Այսպես, ակցիզային հարկի հավաքագրումն աճել է 1,1 մլրդ դրամով կամ 1,5 անգամ:
Մաքսատուրքերը հունվարին 765,5 մլն դրամով (27,3 տոկոսով) ավելի շատ է գանձվել, քան նախորդ տարի: Նկատենք, որ այդ «գործընթացը» չի ուղեկցվել արտաքին առեւտրաշրջանառության համարժեք աճով:
Նախնական տվյալներով՝ այս տարվա հունվարին արտաքին առեւտրաշրջանառությունը կրճատվել է 30,4 տոկոսով:
Ինչպես հայտնի է, ԵՏՄ երկրներից ներկրվող ապրանքների դեպքում մաքսատուրք չի գանձվում, հետեւաբար զգալիորեն աճել են երրորդ երկրներից ներմուծվող ապրանքների (այդ թվում սպառողական) մաքսատուրքերի դրույքաչափերը:
Նշենք, որ ներմուծման միջին գները հունվարին աճել են տարեկան կտրվածքով 12,1 տոկոսով: Այդ երկակի ազդեցության արդյունքում երրորդ երկրներից ներմուծվող ապրանքների մանրածախ գները պետք է բարձրանային: