Հունվարին իրականություն դարձան մեր տնտեսության համար կանխատեսվող վատթարագույն սցենարները: Արդյունաբերության, մանրածախ առեւտրաշրջանառության մեջ, արտաքին առեւտրում, ինչպես նաեւ դրամական փոխանցումների հոսքում անցյալ տարվա բացասական միտումները հստակորեն արտահայտվեցին նոր տարվա առաջին ամսվա ընթացքում: Նախ նշենք, որ «փոխանցումներ» եզրույթով բնորոշվում են բանկային համակարգի միջոցով ֆիզիկական անձանց կողմից ստացվող, ոչ առեւտրային նշանակության դրամական փոխանցումները:
«Ռուսական» դրամական փոխանցումների անկումը սկսվեց անցյալ տարի եւ շարունակվեց ընթացիկ տարվա հունվարին: Տարվա առաջին ամսվա ընթացքում փոխանցումների թիվը տարեկան կտրվածքով կրճատվեց նաեւ այլ երկրների մասով՝ բացի ԱՄՆ-ից, Չինաստանից եւ Թուրքիայից: ԱՄՆ-ի մասով փոխանցումների աճը մեկ տարվա ընթացքում կազմեց 1.4 մլն դոլար, Չինաստանի եւ Թուրքիայի մասով՝ զուտ խորհրդանշական, համապատասխանաբար, 2 հազար եւ 31 հազար դոլար:
Բայց, ընդհանուր առմամբ, փոխանցումների գծով հսկայական անկում գրանցվեց (գրեթե 45.4 մլն դոլարի)՝ պայմանավորված Ռուսաստանից դրամական փոխանցումների կրճատմամբ (43.5 մլն դոլարի կրճատմամբ): Դա պայմանավորված է ինչպես մեր հյուսիսային հարեւանի տնտեսական ճգնաժամով, այնպես էլ մի քանի տասնյակ հազար աշխատանքային միգրանտների մուտքը երկիր արգելելու հանգամանքով:
Հունվարին վերջին տարիների ընթացքում հազվագյուտ դեպք արձանագրվեց. մանրածախ առեւտրաշրջանառության ծավալը կրճատվեց 2.6%-ով: Ըստ էության, դա նշանակում է բազմաթիվ ընտանիքների եկամուտների բացարձակ կրճատում, որոնց համար դրամական փոխանցումներն ընտանեկան բյուջեի կարեւորագույն մասն են կազմում:
Եթե նշված միտումը շարունակվի, ապա ընթացիկ տարում մեր տնտեսության դժվարին խնդիրներն ավելի կուժեղանան: Թվարկենք միայն մի քանի ոլորտներ, որոնք առավել խոցելի են աշխատանքային միգրացիայի սահմանափակման եւ դրամական փոխանցումների անկման տեսանկյունից. բնակչության զբաղվածություն եւ եկամուտներ, արժութային շուկա, ապրանքների ներմուծում: Այստեղից էլ կսկսվի շղթայական ռեակցիան՝ տարածվելով այլ ոլորտների վրա: