Կալիֆորնիական Ֆրեզնո քաղաքում ապրիլի 23-ին Հայոց ցեղասպանության զոհերի հիշատակին հուշարձան կբացվի: Բացման արարողությունը կազմակերպելու է Հայոց ցեղասպանության 100-րդ տարելիցի Ֆրեզնոյի հանձնախումբը:
Ըստ «Asbarez»-ի, հուշարձանի կառուցվում է բազմաթիվ հովանավորների առատաձեռնության, ինչպես նաեւ Ֆրեզնոյի Կալիֆորնիա նահանգի համալսարանի ղեկավար Ջոզեֆ Կաստրոյի աջակցության շնորհիվ:
«Մեր պարտականությունն է՝ էստաֆետը փոխանցել հաջորդ սերնդին, որպեսզի այն երբեք չմոռանա մարդու հանդեպ մարդու անմարդկային վերաբերմունքի մասին»,- ասել է Ֆրեզնոյում Հայաստանի պատվավոր հյուպատոս, հուշարձանի ստեղծման հանձնաժողովի նախագահ Պերճ Աբգարյանը:
Հիշեցնենք, որ Հայոց ցեղասպանության զոհերի հիշատակին նվիրված հուշարձանը կանգնեցնելու են Ֆրեզնոյում Կալիֆորնիա նահանգի համալսարանի տարածքում: Փոլ Հալաջյանի նախագծած կառույցը մարմնավորելու է խորհրդանիշեր, որոնք հայ ժողովրդի համար մշակութային նշանակություն ունեն:
Հուշարձանը կառուցվելու է բետոնից ու տուֆից, հիմնական մասերը կլինեն 9 սյուները, որոնք կտեղադրվեն հանդիպակաց՝ դեպի ներս թեքվածությամբ, ինչպես Ծիծեռնակաբերդի հուշահամալիրը: 9 սյուները խորհրդանշում են պատմական Հայաստանի 6 նահանգները, Կիլիկիան, հայկական սփյուռքը եւ Հայաստանի Հանրապետությունը: Բարձրությունը շրջանաձեւ նվազելու է՝ առաջինի բարձրությունը կազմելու է 19 ոտնաչափ, վերջինը՝ 15 ոտնաչափ, ինչն ընդգծում է 1915 թվականի նշանակությունը: