Թեեւ Հայաստանում USAID-ի ռազմավարական առաջնայնություններն անփոփոխ են մնացել, սակայն այդ ուղղություններով իրականացվող ծրագրերը կկրճատվեն։ Այս մասին ապրիլի 14-ին ԱՄՆ դեսպանատանը կայացած մամուլի ասուլիսի ժամանակ հայտարարեց Երեւանում USAID գրասենյակի տնօրեն Քարեն Հիլարդը։
Նա եւս մեկ անգամ, վստահեցրեց., որ 2013թ-ից վեր USAID-ի ռազմավարությամբ սահմանված առաջնայնությունները Հայաստանի համար անփոփոխ են մնում։ «Այդ ուղղվածություններն են. տնտեսական ոլորտում գյուղերի, հատկապես սահմանամերձ գյուղերի զարգացումը, զբոսաշրջության զարգացումը, Հայաստանի ջրային պաշարներին վերաբերող ծրագրերը, մասնավորապես, Արարատյան դաշտավայրին վերաբերող ծրագրերը, ինչպե նաեւ երկրի էներգետիկ անկախության ուղղված նախաձեռնությունները։ Եվ այս ոլորտում վերջին ուղղությունը մարդկային կապիտալի զարգացումն է, այսինքն՝ ծրագրերը, որոնք ուղղված են Հայաստանում աշխատուժի զարգացմանը։
Կառավարման ոլորտում USAID-ը կշարունակի տարածքային կառավարման եւ տեղական ինքնակառավարման բարեփոխումների ուղղությամբ ծրագրեր իրականացնել։ Մենք կմիանանք նաեւ մի շարք դիվանագիտական առաքելությունների, որոնց նպատակն է օգնել հակակոռուպցիոն նախաձեռնություններին։ Կշարունակվեն սոցիալական քաղաքականության ծրագրերը։ Ծրագրերի կրճատման պարագայում մենք կփորձենք առավել արդյունավետ աշխատել»,- հավելեց Հայաստանում USAID-ի գրասենյակի ղեկավարը։