Թուրքիան պարտավոր է ճանաչել իր մեղքը եւ արդարացի հատուցում տալ գործած հանցանքի համար: Այս մասին Ցեղասպանության 100-ամյա տարելիցի շրջանակում Երեւանում ընթացող Միջեկեղեցական համաժողովին այսօր՝ ապրիլի 22-ին, ասաց Մարոնի կաթոլիկ եկեղեցու պատրիարք Մոր Բուտրոս ալ Ռայը: (Ֆոտոռեպորտաժ)
«Իրադարձություններից 100 տարի անց աշխարհը դեռ որոնում է պատշաճ բառը՝ օգտագործել Ցեղասպանություն, թե այլ բառ: Բայց մեզ համար ամենակարեւորը եզրույթի հոգին է: Մենք բոլորս գիտակցում ենք, թե հայերը ինչպես սկսեցին իրենց ընթացքը նորից, եւ ավելի ու ավելի հզոր են դառնում: Մենք այստեղ ենք, որ ասենք, որ ամենակարեւորն այն է, որ կանգնենք, սկսենք նորից եւ շարունակենք ապրելը: Երկրորդ նպատակը մեր այստեղ գտնվելու այն է, որ մենք հստակ այստեղ ենք, որ ճանաչենք եւ ասենք, որ հայերը դարձել են Ցեղասպանության զոհ: Մենք պարտավոր ենք ճանաչել Ցեղասպանությունը, որ կանխենք նոր ցեղասպանությունները:
Պատրիարքի խոսքով՝ եթե միջազգային հանրությունը չի ճանաչում ցեղասպանությունը, ապա հենց ինքն է պատասխանատու դառնում նոր ցեղասպանությունների համար:
«Միջազգային համայնքը կողքից դիտորդի դեր է ստանձնում, մինչ բազմաթիվ ցեղասպանություններ են տեղի ունենում: Թուրքիան սպանություն է գործել եւ պետք է խոստովանի դա: Սա կարեւոր է, որ մենք զղջանք, ապաշխարենք, ուղղվենք»,- ասաց նա:
Լուսանկարները՝ Արսեն Սարգսյանի/NEWS.am
