Ֆրանսիայի Մարսել քաղաքում առավոտից սկսել են Հայոց ցեղասպանության զոհերի հիշատակի արարողությունները։ Ավելի քան 800 մարդ է հավաքվել Բոմոնի հայկական եկեղեցու մոտ՝ Մարսելի 12-րդ օկրուգում։
Ինչպես գրում է «La Provence»-ը, միջոցառման մասնակիցների թիվն աճում է, այս պահին արդեն հասնելով 5 հազարի։ Մասնակիցների թվում են դեպրտամենտի գլխավոր խորհրդի նախագահ Մարտին Վասսալը, Ֆրանսիայի Ազգային Ժողովի պատգամավոր Վալերի Բուայեն, այլ պաշտոնատար անձինք, նաեւ հայտնի մոդել Ադրիանա Կարեմբյոն՝ ամուսնու՝ Արամ Օհանյանի հետ։
Վալերի Բուայեն «Twitter»-ում գրել է, թե այլ պաշտոնյաների հետ հիշատակի տուրք է մատուցում Ցեղասպանության զոհերին, նշում, որ մեծաթիվ մարդիկ են հավաքվել։ «Եկեք չմոռանանք։ Երբ տեղահանում են, երբ բռնաբարում են, դա քաղաքացիական պատերազմ չէ, դա ցեղասպանություն է»,- ընդգծել է նա եւ հավելել. «Երիտասարդ եւ ծեր, մենք բոլորս համախմբվել ենք, որ միաձայն դատապարտենք 20-րդ դարի զանգվածային սպանությունները։ Այսօր մենք հարգում ենք ոչ միայն հայ զոհեի, այլեւ բոլոր նահատակների հիշատակը»։
