Իրվեյնի Կալիֆորնիական համալսարանի ուսանողական մարմնի ղեկավարությունը միաձայն բանաձեւ է ընդունել, որը կոչ է անում Թուրքիայից հանել կապիտալը՝ կապված Հայոց ցեղասպանության ժխտման հետ: Ըստ «Asbarez»-ի, բանաձեւն Իրվեյնի Կալիֆորնիական համալսարանին, բուհի հիմնադրամին, ինչպես նաեւ Կալիֆորնիական համալսարանին ամբողջությամբ կոչ է անում Թուրքիայից հանել 72.6 մլն դոլարի չափով ներդրումները՝ այդ երկրի հանցագործության եւ Հայոց ցեղասպանության ժխտման պատճառով:
«Որպես Հայոց ցեղասպանությունը վերապրածի ժառանգ եւ Կալիֆորնիական համալսարանի ուսանողուհի, ես այնքան վրդովված եւ հիասթափված էի, երբ իմացա, որ Կալիֆորնիական համալսարանը՝ պետական հաստատություն, ավելի քան 70 մլն դոլար է ներդնում Թուրքիայում: Այդ ներդրումները ֆինանսավորում են թուրքական ժխտողական քաղաքականության քարոզչությունը: Ուսանողների կողմից կրթության համար վճարված դոլարները՝ իմ դոլարները, ներդրվում են մի կառավարությունում, որը ժխտում է պատմությունը եւ խախտում է մարդու իրավունքները: Ես պետք է ներկայացնեի այդ բանաձեւը, որպեսզի գոնե իմ ուսանողական մարմինն ու իմ համալսարանը մասնակից չլինեն Հայոց ցեղասպանության ժխտմանը»,- ասել է ուսանողի Կառլա Քեքեջյանը:
Հիշեցնենք, որ նախկինում նման բանաձեւեր են ընդունել նաեւ Լոս Անջելեսի եւ Բերքլիի Կալիֆորնիական համալսարանների ուսանողական մարմինները:
