Վարչապետ Հովիկ Աբրահամյանն ընդունել է Վերակառուցման եւ զարգացման եվրոպական բանկի նախագահ Սումա Չակրաբարտիի գլխավորած պատվիրակությանը:
Վարչապետը կարեւորել է ՎԶԵԲ-ի դերը մեր երկրի տնտեսության զարգացման առանցքային ոլորտներում իրականացվող ծրագրերում եւ նշել, որ կառավարությունը շահագրգիռ է ավելի ընդլայնել ու զարգացնել երկկողմ արդյունավետ համագործակցությունը: Հովիկ Աբրահամյանի խոսքով՝ Հայաստանի եւ ՎԶԵԲ-ի միջեւ փոխգործակցությունը տարեցտարի ընդլայնվում է, ինչի արդյունքում էլ ներկայում քննարկվում է 2015-2018 թվականների երկկողմ համագործակցության նոր ռազմավարության նախագիծը: Այն կներառի երեք հիմնական ուղղություն՝ մասնավոր հատվածի մրցունակության խթանում, կապիտալ շուկաների զարգացում եւ տեղական արժույթով ֆինանսավորում, կայուն եւ առեւտրայնացված կոմունալ ծառայությունների զարգացում:
Կառավարության ղեկավարը բարձր է գնահատել ՎԶԵԲ-ի կողմից մեր երկրի ֆինանսական հատվածի զարգացմանը ցուցաբերվող օժանդակությունը եւ վարկավորման հասանելիության ընդլայնումը: Վարչապետն ընդգծել է, որ ՓՄՁ-ների զարգացումը ՀՀ կառավարության գերակայությունների թվում է եւ գործադիրը շարունակելու է այդ ուղղությամբ հետեւողական քայլերի իրականացումը: Հովիկ Աբրահամյանը գնահատելի է համարել նաեւ մեր երկրի կապիտալի շուկայի զարգացման գործում ՎԶԵԲ-ի ներդրումը, մասնավորապես, դրամային պարտատոմսերի թողարկումը:
Շնորհակալություն հայտնելով ջերմ ընդունելության համար՝ ՎԶԵԲ նախագահը շեշտել է, որ վերջին շրջանում նշանակալի առաջընթաց է գրանցվել ՀՀ կառավարության հետ փոխգործակցության զարգացման ուղղությամբ: Դրա արդյունքում, Սումա Չակրաբարտիի խոսքով, ավելացել են ՀՀ տնտեսության մեջ բանկի ներդրումային ծավալները: Պարոն Չակրաբարտին հույս է հայտնել, որ երկկողմ համագործակցության նոր ռազմավարությունը թույլ կտա ընդլայնել ՀՀ-ում տարբեր ծրագրերի իրականացման համար հատկացվելիք ֆինանսավորման ծավալները:
Ընդգծելով, որ վերջին տարվա ընթացքում՝ վարչապետի պաշտոնավարման ժամանակահատվածում, ՀՀ-ում գործարար միջավայրի բերալավման ուղղությամբ արձանագրվել է լուրջ առաջընթաց՝ ՎԶԵԲ նախագահը կարեւորել է այդ ուղղությամբ համատեղ նոր ծրագրերի իրականացումն ու հարկային եւ մաքսային ոլորտներում բարեփոխումների շարունակականության ապահովումը: Սումա Չակրաբարտին ընդգծել է նաեւ, որ ՎԶԵԲ-ը պատրաստ է շարունակել ու ընդլայնել օժանդակությունը Երեւանում եւ մեր երկրի այլ քաղաքներում էներգախնայողության ապահովման, Երեւանի մետրոպոլիտենի վերակառուցման, ճանապարհաշինության եւ նոր ենթակառուցվածքային ծրագրերի իրականացման ուղղությամբ:
Հանդիպման ընթացքում անդրադարձ է կատարվել նաեւ Կոտայքի մարզի կոշտ թափոնների կառավարման համակարգի եւ հայ-վրացական սահմանի անցման կետերի արդիականացման ծրագրերին, ՀՀ-ում բիզնես օմբուդսմենի ինստիտուտի ներդրման գաղափարին, ինչպես նաեւ առաջիկայում Թբիլիսիում կայանալիք ՎԶԵԲ տարեկան ժողովի աշխատանքներին: Զրուցակիցները քննարկել են երկուստեք հետաքրքրություն ներկայացնող մի շարք այլ հարցեր եւս: