Թուրքիայի ԱԳՆ-ն կանչել է Իսրայելի դեսպանին եւ բացատրություն պահանջել Իսրայելի պաշտպանության նախարար Էհուդ Բարաքի` թուրքական հետախուզության նոր ղեկավարի վերաբերյալ օգոստոսի 2-ին արած հայտարարության շուրջ: Օգոստոսի 2-ին Բարաքն ասել էր, որ Թուրքիայի հետախուզության նոր ղեկավարը Իրանի կողմնակիցն է եւ Իրանին գաղտնի տեղեկություններ է հաղորդելու Իսրայելի բանակի մասին: Հանդես գալով կուսակցական հավաքի ժամանակ, Էհուդ Բարաքը հայտարարել է, որ Թուրքիան մնում է դաշնակից երկիր եւ ռազմավարական գործընկեր, բայց հատուկ ծառայությունների նոր ղեկավարը պաշտպանում է իրանական ռեժիմը եւ դա մտահոգություն է առաջացնում:
Թուրքիայի ԱԳՆ-ն Իսրայելի դեսպան Գաբի Լեւին կանչել եւ իր բողոքն է արտահայտել այդ ելույթի կապակցությամբ:
Հիշեցնենք, որ մայիսին Թուրքիայի ազգային հետախուզական կազմակերպության ղեկավար է նշանակվել Հաքան Ֆիդանը, ով նախկինում զբաղեցրել է վարչապետի արտաքին հարաբերությունների գծով օգնականի եւ ՄԱԳԱՏԵ-ում Թուրքիայի ներկայացուցչի պաշտոնները: Նա դեմ է եղել Իրանի դեմ պատժամիջոցների կիրառմանը: