Համաշխարհային բանկը 2015թ. Հայաստանի ՀՆԱ աճը կանխատեսել է 0.8 տոկոսի մակարդակով։ Սա այն դեպքում, երբ հունվարին հրապարակած նախորդ զեկույցում Հայաստանի տնտեսության աճը կազմում էր 3.3 տոկոս։ Այս մասին ասված է ՀԲ «Գլոբալ տնտեսական հեռանկարներ» (Global Economic Prospects) հունիսյան զեկույցում։

Ընդ որում, զեկույցի համաձայն, 2016թ. Հայաստանի ՀՆԱ աճը կկազմի 2.7 տոկոս (նախորդ զեկույցում այս կանխատեսումը 3.7 տոկոս էր), իսկ 2017թ. աճի կանխատեսումը  3 տոկոս է (նախորդ զեկույցում 4.1 տոկոս)։

Համաձայն ՀԲ կանխատեսումների՝ այս տարի զարգացող երկրներում տնտեսական աճի տեմպերը կանխատեսվում են 4.4 տոկոսի մակարդակով՝ 2016 թ. համար մինչեւ 5.2, իսկ 2017թ. համար մինչեւ 5.4 տոկոս աճի հնարավորությամբ։

Ռուսաստանում 2015թ. տնտեսական աճը կպակասի 2.7 տոկոսով, իսկ 2016թ. չնչին վերելք կգրանցի նավթի ցածր գների ադապտացմանն ուղղված մակրոտնտեսական քաղաքականության միջոցների իրականացման արդյունքում։

Համաձայն զեկույցի՝ Թուրքիայում 2015թ. տնտեսական աճի տեմպերը կկազմեն 3 տոկոս։ Հունիսին կայացած ընտրություններից հետո ակնկալվում է մասնավոր ծախսերի աճ, եթե քաղաքական անորոշության պայմանները չեզոքացվեն։ վառելիքի ցածր գները ու արտահանման աճը, ըստ ՀԲ մասնագետների, կնպաստեն Թուրքիայի առեւտրային հաշվեկշռի դեֆիցիտի կրճատմանը։