Այսօր Հայ ազգային կոնգրեսի անդամները Լեւոն Տեր-Պետրոսյանի գլխավորությամբ մեկնեցին Իջեւան, այցելելու «Հայկական ժամանակ» թերթի գլխավոր խմբագիր Նիկոլ Փաշինյանի հայրական տուն, ինչպես նաեւ հանդիպելու Իջեւանում Կոնգրեսի ակտիվի հետ: ՀԱԿ-ի շտաբի դիմաց մեծ բազմություն էր հավաքվել, տպավորություն էր, թե հանրահավաք է կազմակերպված: Շտաբի դիմաց լրագրողների հարցերին ի պատասխան Լ. Տեր-Պետրոսյանն ասաց, որ 1998 թվականից հետո քանի գնում ընտրություններն ավելի «բռի, վայրենի ու ցինիկ» են դառնում եւ որ դրան նպաստում է նաեւ այն, որ Արեւմուտքին ձեռք է տալիս այս իշխանությունը: «Ցեղասպանությունը տվեցին, Ղարաբաղն էլ կտան, այդ ժամանակ էլ իրենց (Արեւմուտքին) պետք չի լինի այս իշխանությունը»,- ընդգծեց Լ. Տեր-Պետրոսյանը: Այսինքն Ղարաբաղը տալո՞ւ են, հարցին էլ արձագանքեց. «Տված վերջացրած է», հավելելով, որ դա կանխելու միակ ձեւն այն է, որ «այս մարդը» (Սերժ Սարգսյանը) որքան հնարավոր է շուտ հեռանա:
Լրագրողները հետաքրքրվեցին նաեւ, թե իր տպավորությամբ ժողովրդի մեջ պայքարի ոգին պահպանվե՞լ է, թե մարում է, ինչին Լ. Տեր-Պետրոսյանը պատասխանեց. «Այս հավաքը բացարձակապես կազմակերպված չէր: Եթե մենք կազմակերպեինք, այստեղ շատ մեծ հավաք կարող էր լինել: Մենք եկել ենք մեր բարեկամների մոտ, որի լուրը շատերը լսել են ու տարերային հավաքվել: Իհարկե, այս մարդիկ մեր համակիրներն ու նվիրյալներն են, որոնց բացատրելու, համոզելու խնդիր չկա: Բայց հանգիստ եղեք, անկախ նրանից ժողովուրդը կարտահայտվի, թե` ոչ, նա կա, այդ լիցքը գոյություն ունի, այս իշխանությունները ժողովրդի հետ որեւէ կապ չունեն, օտարացած են լրիվ եւ երբ որ պահը գա` ամբողջ ժողովուրդը ոտքի կկանգնի, չմտածեք»:
Իսկ Ձեր վերադառնալով ինչը կփոխվի, հարցին էլ արձագանքեց. «Արդեն փոխվել է: Իմ վերադառնալով ստեղծվել է ժողովուրդ, ստեղծվել է ժողովրդական, քաղաքացիական հզոր հասարակություն: Դա պետք է նկատել ընդամենը»: