Պաշտպանության նախարարությունը համառորեն գաղտնի է պահում այն 8 զինվորականների անունները, որոնք ՊՆ-ի՝ օգոստոսի 6-ին տեղի ունեցած կոլեգիայի արտահերթ նիստի ժամանակ կարգապահական տույժերի են ենթարկվել, ազատվել աշխատանքից: Երբ NEWS.am-ը փորձեց ՊՆ տեղեկատվության եւ հասարակայնության հետ կապերի վարչությունից տեղեկանալ, թե ինչո՞ւ չեն հրապարակվում նրանց անունները, վարչության պետի տեղակալ Ֆելիքս Պողոսյանն ահա թե ինչ ասաց. «ՊՆ կայքում տեղադրված է այնքանը, ինչքան պահանջում է անհրաժեշտությունը՝ տեղեկատվական գաղտնիության ռեժիմն ու տեղեկատվական անվտանգությունը»:
Պողոսյանը շտապեց հավաստիացնել, որ «բոլոր պատասխանատուները տույժեր ստացել են եւ վերլուծված է՝ ինչ կատեգորիա, ինչ տույժեր, ինչ աստիճանի հրամանատարներ»: Ի դեպ, NEWS.am զանգահարած մեր բազմաթիվ ընթերցողներին հետաքրքրում է, թե ինչո՞ւ է ՊՆ-ն գաղտնի պահում նախարար Սեյրան Օհանյանի պատժին արժանացած զինվորականների անունները: «Ասենք թե՝ հայտարարվեց այսինչ այսինչյանի անունը, դա ի՞նչը կփոխի»,-ընթերցողների անհանգստությանն այսպես արձագանքեց Պողոսյանը, միեւնույն ժամանակ հավելելով, թե «տեղադրել ենք այն, ինչը որ ճիշտն է»:
Ի դեպ, ՊՆ կայքում տեղադրված հաղորդագրության մեջ ընդամենը նշվում է, որ օգոստոսի 6-ին տեղի է ունեցել Պաշտպանության նախարարության կոլեգիայի արտահերթ նիստ, որի ընթացքում քննարկվել են զինված ուժերում տեղի ունեցած վերջին արտակարգ միջադեպերը, որոնց արդյունքում կան մարդկային զոհեր: Նիստի ավարտին ընթերցվել են ՀՀ պաշտպանության նախարարի հրամանները զորամասերում տեղի ունեցած դեպքերի եւ մեղավորներին կարգապահական տույժի ենթարկելու մասին: Պնախարարի հրամաններով 8 սպաներ` զորամասերի հրամանատարներ, տեղակալներ, շտաբերի, ստորաբաժանումների, ծառայությունների պետեր ազատվել են զբաղեցրած պաշտոններից:
Նրանցից յոթն արձակվել են ՀՀ ԶՈւ պահեստազոր: 14 սպայի հայտարարվել է խիստ նկատողություն, 6-ի` նկատողություն: 10 սպաներ նախազգուշացվել են ծառայողական ոչ լրիվ անհամապատասխանության մասին: Ստորաբաժանումների 10 հրամանատարներ եւ ծառայությունների պետեր ազատվել են զբաղեցրած պաշտոններից եւ նշանակվել են ավելի ցածր պաշտոնների: 3 սպա ազատվել է զբաղեցրած պաշտոնից` մնալով ՀՀ ՊՆ կադրերի եւ ռազմական կրթության վարչության տրամադրության տակ: Իջեցվել է մեկ սպայի զինվորական կոչումը:
