Իսրայելի իշխանությունները հայտարարել են, որ դուրս կգան «Ազատության նավատորմի» ձերբակալման մանրամասներն ուսումնասիրող միջազգային հանձնաժողովից, եթե այդ հանձնաժողովի լիազորությունները ենթադրեն իսրայելցի զինվորականների հարցաքննություն:
Իսրայելի դժգոհության պատճառն այն է, որ ՄԱԿ-ի գլխավոր քարտուղար Բան Կի Մունը հերքել է տեղեկությունը, թե այդ հանձնաժողովը չպետք է հարցաքննի միջադեպին մասնակցած զինվորականներին, այլ պետք է բավարարվի իսրայելական զինվորականների անցկացրած հետաքննության տվյալներով: «Իսրայելի վարչապետ Բենյամին Նաթանյահուն պարզ հասկացնել է տալիս, որ Իսրայելը չի մասնակցի կամ համագործակցի որեւէ հանձնաժողովի հետ, որը մտադիր է հարցաքննել իր զինվորականներին»,- ասված է Իսրայելի կառավարության հայտարարությունում: Հաղորդում է «ՌԻԱ նովոստին»:
Ավելի վաղ NEWS.am-ը տեղեկացրել էր, որ «Ազատության նավատորմի» ձերբակալման դեպքի մանրամասներն ուսումնասիրող միջազգային հանձնաժողովը` իսրայելցի նախկին դատավոր Յակով Թուրքելի գլխավորությամբ, օգոստոսի 9-ին սկսել է հարցաքննել վկաներին, այդ թվում նաեւ Բենյամին Նաթանյահուին:
Հիշեցնենք, որ մայիսի 31-ին Իսրայելի ռազմածովային ուժերը ձերբակալել են «Ազատության նավատորմի» 6 նավերը, որոնք հումանիտար օգնություն էին տանում իսրայելական ուժերի կողմից շրջափակման մեջ գտնվող Գազայի հատված: Իսրայելի զինուժի գործողությունների արդյունքում թուրքական Mavi Marmara նավում զոհվել է 9 հոգի: Իսրայելը հայտարարում է, որ իր հատուկ ջոկատայիններն ուղղակի ինքնապաշտպանության են դիմել, քանի որ թուրք ակտիվիստները զենք էին տեղափոխում եւ առաջինն են հարձակվել իսրայելցի զինվորների վրա:
