Նորքի տուն-ինտերնատի 308 սենյակ նորություններն ամենաարագն են հասնում. մինչ մյուս բնակիչները հեռուստացույցի առջեւ նստած սպասում են երեկոյան լուրերին, տիկին Նանուլը ֆեյսբուքի իր անձնական էջով է հետեւում լրատվությանը: 65-ամյա Նանուլ Կարախանյանը տուն-ինտերնատի միակ բնակիչն է, որ համակարգչից եւ սոցիալական կայքերից օգտվել գիտի: Համակարգիչը ձեռք է բերել սեփական ուժերով` Վրաստանում բնակվող հարազատների հետ հաղորդակցվելու համար։
«Քանի որ միայնակ էի, ոչ մի հարազատ չունեի Հայաստանում, որոշեցի համակարգիչ գնել: Գումար հավաքեցի, մի մասն էլ ընկերուհիներս օգնեցին, նոթբուք գնեցի: Հետո մի կին, որը եկել էր մեր տուն-ինտերնատ, ինձ օգնեց ֆեյսբուքում էջ բացել»,- NEWS.am-ին պատմեց տիկին Նանուլը։
Սկզբում անվարժ, հետո ավելի վստահ` տիկին Նանուլը շատ արագ յուրացրեց համակարգչի լեզուն եւ 65 տարեկանում վարակվեց դեռահասների «հիվանդությամբ». աչքերը չբացած նոթբուքն է բացում եւ օրվա մեծ մասը էկրանի առջեւ անցկացնում։
«Առավոտյան վեր եմ կենում, գիշերանոցը հագիս նստում եմ նոթբուքի դիմաց: Նայում եմ՝ ով կա, ով չկա ֆեյսբուքում, ով է լավ տրամադրությամբ օրն ավարտել, ով է գիշերը մտել սայթ»,- պատմեց տիկին Նանուլը։
Տիկին Նանուլն արդեն 140 ընկեր ունի ֆեսբուքում, ուշադիր հետեւում է բոլորի անցուդարձին, ջանասիրաբար «հավանում» բոլոր նկարները, մեկնաբանություններ գրում։
«Իմ ձեռքի տակով ոչ մի նկար առանց քոմենթի չի անցնում»,– կատակում է նա:
Տիկին Նանուլը տուն-ինտերնատում իր ամուսնու՝ 69-ամյա Խորենի հետ է բնակում: 45 տարվա ամուսինները մինչեւ ծերանոց տեղափոխվել Երեւանում են բնակվել, զավակներ չունեն: Խորեն պապն աշխատել է որպես հյուսն, աշխատանքի ժամանակ վնասել աչքերը, կորցրել տեսողությունը։ Կարախանյանները վաճառել են իրենց միակ ունեցվածքը՝ տունը, աչքերի վիրահատության համար: Վիրահատությունից հետո վերականգնվել է Խորեն պապի միայն մեկ աչքի տեսողությունը՝ 40%-ով: Նա հաշմանդամության երկրորդ կարգ է ստացել ու տեղափոխվել ծերանոց: Կինը նրան միացել է միայն մի քանի տարի անց. տարիքն ու առողջական վիճակը անհամապատասխան են եղել ծերանոց ընդունվելու համար: Երեք տարի առաջ տիկին Նանուլը աշխատանքի է անցել ծերանոցում, դրանից մեկ տարի հետո թոշակի անցել ու դարձել տուն-ինտերնատի բնակիչ։
Ամուսիններն օրեր առաջ միասին նշել են Խորեն պապի 69 ամյակը: Տիկին Նանուլը ֆեյսբուքյան 140 ընկերների հետ կիսվել է ծննդյան տարեդարձի լուսանկարներով: 65-ամյա կնոջ երազանքն է լուսանկարելու հնարավորությամբ սեփական հեռախոս գնելը, որպեսզի բաց չթողնի ծերության երջանիկ ակնթարթները հավերժացնելու եւ ընկերների հետ կիսվելու ոչ մի հնարավորություն։