ԱՄՆ-Թուրքիա հարաբերություններում արձանագրված վերջին շրջանի սրացումները էական ազդեցություն չեն ունենա հայ-թուրքական գործընթացի վրա: Այս մասին NEWS.am-ի թղթակցի հետ զրույցում ասաց ԱԺ «Ժառանգություն» խմբակցության ղեկավար Ստեփան Սաֆարյանը: «Հայ-թուրքական գործընթացն, ընդհանուր առմամբ, սկիզբ է առել այն հեռահար նպատակով, որ հայկական գործոնը ԱՄՆ-ի կողմից օգտագործվի՝ Թուրքիայի վրա ճնշումներ բանեցնելու համար»,-նշեց նա: Պատգամավորի խոսքով՝ պատահական չէ, որ Հայաստան եկած ԱՄՆ պետքարտուղար Հիլարի Քլինթոնը, խոսելով հայ-թուրքական հարաբերությունների մասին, հայտարարեց, որ գնդակը Թուրքիայի դաշտում է:
«Այս հայտարարությունը չարվեց այն բանի համար, որ Հայաստանի պահվածքը հիացրել է ԱՄՆ-ին: Այլ այն պատճառով, որ Թուրքիան գնալով դառնում է անկառավարելի՝ տարածաշրջանային տերություն դառնալու իր ամբիցիանաներով, որոնք էապես հակադրվում են Արեւմուտքի, եւ տվյալ դեպքում՝ ԱՄՆ-ի շահերին: Եւ հետեւաբար, հայկական խաղաքարտը մշտապես օգտագործվելու է Թուրքիային ճնշելու համար»,-ընդգծեց պատգամավորը:
Հարցին, թե այդ ճնշումների համատեքստում հնարավո՞ր է, որ ԱՄՆ-ը ստիպի Թուրքիային առաջինը վավերացնել հայ-թուրքական արձանագրությունները, պատգամավորը արձագանքեց. «ԱՄՆ-ը շատ ավելի լուրջ զինանոց ունի՝ դա Հայոց Ցեղասպանության ճանաչումն է, որը կսթափեցնի Թուրքիային: Որքան ԱՄՆ-ը խուսափում է տարածաշրջանում սկզբունքային արժեքների վրա հիմնված քաղաքականություն վարելուց, այդքան տեղ է թողնում Թուրքիային՝ երեսպաշտ քաղաքականություն վարելու համար՝այդ թվում Իրանի, Իսրայելի եւ մյուս հարցերով: ԱՄՆ-ն, իհարկե, կարող է փորձել ճնշել Թուրքիային՝ վավերացնել արձանագրությունները, սակայն դա չէ լուծումը»: Լուծումն, ըստ Սաֆարյանի, կլինի այն, «երբ Օբամայի վարչակազմն իր քաղաքականության անկյունաքարը կդարձնի պատմական իրողությունների արձանագրումն ու դրանց ճանաչումը»: «Ամեն հերթական ապրիլի 24-ի նախօրյակին կամ վճռորոշ պահի, երբ Թուրքիային հաջողվում է ԱՄՆ-ից կորզել հերթական ուրացումը հայկական խնդիրների վերաբերյալ, այդքանով Թուրքիան դառնում է սանձարձակ ու լպիրշ»,-եզրափակեց Սաֆարյանը:
Հիշեցնենք, որ ԱՄՆ նախագահ Բարաք Օբաման կոչ է արել Անկարային՝ փոխել իր մոտեցումներն Իսրայելի նկատմամբ, հակառակ դեպքում Վաշինգտոնը կսահմանափակի զենքի առաքումները Թուրքիա: Բացի այդ, Օբաման կոչ է արել Անկարային մեղմացնել տոնը «Ազատության նավատորմի» զավթման իրավիճակի կապակցությամբ: Վաշինգտոնը նաեւ կտրուկ դատապարտել է Թուրքիային` ՄԱԿ-ի կողմից Իրանի դեմ պատժամիջոցների կիրառման դեմ հանդես գալու համար:
