Վանաձորում մի ամբողջ ընտանիք է թունավորվել սնկից: Նախորդ օրը՝ սեպտեմբերի 14-ին, ժամը 21:00-ի սահմանում սնկային թունավորում ախտորոշմամբ, «Շտապօգնության» մեքենայով Վանաձորի բժշկական կենտրոն են տեղափոխվել Փաշինյանների ընտանիքի 3 անդամներ՝ 48-ամյա Սմբատ Փաշինյանը, 46-ամյա Գայանե Փաշինյանը և 16-ամյա Վլադիմիր Փաշինյանը:
Ընդունման պահին տուժածների վիճակը գնահատվել է ծանր: Նրանք հոսպիտալացվել են անգիտակից վիճակում, հաջորդ առավոտյան գիտակցության եկել: Նրանց վիճակը բավարար է, մի քանի օրից դուրս կգրվեն հիվանդանոցից:
Ընտանիքի մայրը՝ Գայանե Փաշինյանը, NEWS.am-ի թղթակցի հետ զրույցում պատմեց, որ սունկը հավաքել է իր որդին, այն ուտելուց ժամեր անց իրենց զգացողությունը կտրուկ վատացել է:
Հիվանդությունների վերահսկման եւ կանխարգելման ազգային կենտրոնի Լոռու մասնաճյուղի տնօրեն Անժելա Հովհաննիսյանը NEWS.am-ի հետ զրույցում ասաց, որ մարզում այս տարի գրանցված թունավորումների թիվը արդեն գերազանցել է նախորդ ամբողջ տարվա ցուցանիշը: Այս տարվա 9 ամիսների ընթացքում գրանցվել է 14 դեպք, տուժել է 24 մարդ, նախորդ տարվա 12 ամիսներին գրանցվել է 11 դեպք, տուժել 14 մարդ: