Պղնձի համաշխարհային գները, չնայած անդադար տատանումներին, ընդհանուր առմամբ նվազման միտում ունեն: Այս մասին են վկայում, մասնավորապես, այդ հարցերում հեղինակավոր Մետաղների լոնդոնյան բորսայի (LME) տվյալները: Դրանց համաձայն, ընթացիկ տարվա անցած ժամանակահատվածում պղնձի առավելագույն արժեքը (1 տոննան՝ 6447.6 դոլար) գրանցվել է մայիսի 11-18-ին: Դրանից հետո գների դինամիկան հիմնականում անկմամբ է բնութագրվել:
Հոկտեմբերի 12-ի դրությամբ, պղինձն էժանացել է գրեթե 1105.8 դոլարով՝ 1 տոննայի դիմաց (կամ 17.2%-ով): Բնականաբար, այս տեղաշարժերն արտացոլվել են պղնձի հանքանյութի եւ խտանյութի համաշխարհային գների վրա: Հիշեցնենք, որ դրանք առաջատար դեր ունեն մեր արտահանման մեջ: Այդ առիթով ներկայացնենք ընթացիկ տարվա հունվար-հունիսի տվյալները՝ դրանք համեմատելով անցյալ տարվա նույն ժամանակահատվածի ցուցանիշների հետ:
Հայաստանում «պղնձի հանքանյութ եւ խտանյութ» խմբում միջին մաքսային գինը նշված ժամանակահատվածում նվազել է 13.6%-ով՝ 1 տոննայի դիմաց մինչեւ 1107 դոլարի անկում արձանագրելով: Սակայն բնական ցուցանիշերում այս ապրանքների արտահանումն աճել է ավելի քան մեկուկես անգամ՝ 57.2%-ով: Տարբերությունը հանգեցրել է պղնձի հանքանյութի եւ խտանյութի արտահանման ընդհանուր արժեքի աճի՝ 41.8 մլն դոլարով կամ գրեթե 1.4 անգամ:
Հայրենական արտահանման ոլորտում պղնձի հանքանյութի եւ խտանյութի ռեկորդներին ոչինչ «չի սպառնում»: Ամեն դեպքում՝ մոտ ապագայում, քանի որ մոտակա մրցակիցը՝ ծխախոտը, ընդհանուր ծավալով ավելի քան 2.2 անգամ զիջել է առաջատարին: Պատահական չէ, որ Զանգեզուրի պղնձամոլիբդենային կոմբինատն ավանդաբար հայտնվում է Հայաստանի խոշորագույն հարկատուների ցանկի վերին հորիզոնականներում (ընթացիկ տարվա հունվար-հունիսին՝ 2-րդ հորիզոնական):
Նկատենք, որ Հայաստանի արտահանման մեջ պղնձի հանքանյութի եւ խտանյութի տեսակարար կշիռն ավելացել է 7.0 տոկոսային կետով՝ հասնելով տպավորիչ 23.6%-ի: Հավելենք, որ արտահանման աճից բացի, պղնձի հանքանյութի եւ խտանյութի մասնաբաժինն ավելացել է նաեւ մեխանիկորեն, արտահանման ընդհանուր ծավալի անկման հետեւանքով (4.6%-ով):
