Երեւանում մեկնարկել է Ֆուտբոլի Հայաստանի ազգային հավաքականի երկրպագուների ՖԱՖ շարժման երթը՝ ՀՖՖ նախագահ Ռուբեն Հայրապետյանի հրաժարականի պահանջով: NEWS.am-ի թղթակիցը հաղորդում է, որ մասնակիցները Մաշտոցի պողոտայով շարժվում են դեպի Հանրապետության հրապարակ, որտեղից էլ կգնան Խանջյան փողոց՝ Հայաստանի ֆուտբոլի ֆեդերացիայի գրասենյակ: Երթը հսկում են մեծ թվով ոստիկաններ, ՖԱՖ շարժման մասնակիցները վանկարկում են «Ֆուտբոլ ենք ուզում», «Պահանջում ենք հրաժարական»: Երթի մասնակիցները ճայթուկներ են պայթեցնում, ոստիկանները զգուշացրին, որ այլեւս ճայթուկներ չօգտագործեն: (ֆոտոռեպորտաժ)
Հիշեցնենք, որ ՖԱՖ-ի նախորդ երթի ժամանակ՝ նոյեմբերի 16-ին, ճայթուքների պատճառով էր ոստիկանների եւ երթի մասնակիցների միջեւ բախումներ սկսվել:
Երկրպագուները ՀՖՖ-ից պահանջում են քայլեր ձեռնարկել հավաքականում ստեղծված ծայրաստիճան վատ վիճակից դուրս գալու համար: Նրանք պահանջում են հավաքականի փորձառու գլխավոր մարզիչ եւ լավ մարզավիճակ ունեցող ֆուտբոլիստների հրավիրել հավաքական, նաեւ էժանացնել հավաքականի հանդիպումների տոմսերը: